AAP-in tualchhuak zu chawilara zu zawrh duh

Tualchhuak siam zu chawilar leh dan fel tak siam chunga sawrkarin zu zawrh a tul an tih thu AAP Mizoram chuan an sawi.
Aam Admi Party Mizoram chuan sawrkarna an chang a nih chuan Mizo buh, thlai leh thei hmangin Mizo zu chi hrang hrang, wine leh beer te dan fel tak hnuaiah siam a nih tur thu an sawi.
Industrial policy hnuaiah buh leh sawhthing bakah lakhuihthei, dragon fruit, balhla, kawlthei, fu leh a dangte hmanga zu/ beer/ wine siamchhuah chu kuthnathawktute khai chhuah theihna policy pawimawh tak a nih tur thu sawiin, Mizoram pawn thlenga hralh chhuah tlak (export quality) a hma lak an tum thu an sawi a ni.
Buh leh thei hmanga zu siam chuan thalaite leh kuthnathawktute nasa taka a chawikan dawn bakah tourism thlengin state-in a hlawkpui thei dawn tih an sawi a. A senchi (India Made Foreign Liquor) chungchangah chuan mipuiah opinion poll la in, zawrh leh zawrh lohah a tam zawk duhdana sawrkarin a kalpui tur thu an sawi.
Tunah sawrkarin zu khap mah se, a bawhzui lam a chak loa, ualau taka zawrh a nih reng bakah zu avanga buaite enkawl danah leh naupang leh thalaite hnena zu chungchang an hriat tur hrilhhriat lamah a chak lo nia an hriat thu AAP Mizoram hian an sawi a. An policy-ah chuan rehabilitation lamah ruahmanna fel tak an neih thu leh, kohhran leh NGO nen tangdunin naupang leh thalaite zu chungchanga ngaihdan fel tak an siam theihna atana inhrilhhriatna tur duan a nih tur thu an sawi a ni.