AAP-te INDIA Alliance-ah rinawm ti
Delhi Chief Minister Arvind Kejriwal chuan Aam Aadmi Party-te chuan opposition INDIA alliance-ah an rinawm tlat thu a sawi.
Hei hi tun hnaia Congress Punjab unit tena State-a AAP sorkar chu Congress MLA Sukhpal Singh Khaira chu kum 2015 drug trafficking case-a man a nih avanga political vendetta kalpui anga an puhna karah chuan pawimawh tak anga ngaih a ni.
AAP-te thung chuan Congress puhna te chu hnawlin Bholath legislative laka an hmalakna chu dan ang veka kalpui tiin an sawi ve thung.
Zirtawpa press conference a neihnaah Kejriwal, AAP national convener ni bawk chu Punjab-a Congress legislator man a nih hnuah INDIA alliance hmalam hun zel zawh a ni a.
“AAP chu INDIA alliance-ah hian a rinawm tlat a. Phatsan emaw inlak hran kan tum lo. He alliance-in dharna a siamte tihhlawhtlin kan tum” tiin a sawi.
Case chungchang zawhna chhangin Kejriwal chuan, “Kei pawhin ka hre tawh a, mahse a kimchangin ka la hre lo. Punjab Police-te zawt mai rawh u” a ti a. “Bhagwant Mann sorkar chuan state-a drugs hluar lutuk thalaite tichhetu chu tihtawp ngei a tum a. Mi thiltithei an ni emaw tu pawh ni se zuah an ni dawn lo. Tun case bik chu a kimchang ka hriat loh avangin engmah sawi zui thei ka ni lo” tiin a sawi.
Opposition INDIA alliance chuan prime ministerial candidate neih a nei tawh em tih chungchangah Kejriwal chuan, “System tha tak Indian 140 crore tena an prime minster atana an pawm kan siam a ngai a. Mi mal ni lovin mipui kan tihchak hmasak a ngai a ni” tiin a sawi bawk.
Hetihlai hian Punjab Congress te chuan kum 2024 general election ah an state bikah AAP-te nena thawhho an duh lo thu an sawi chiang tawh thung.