AAP ten lungawilohna kawngzawh Delhi-ah nei

Chandigarh mayoral election leh Enforcement Directorate ten Arvind Kejriwal thu zawhfiah atana an koh avanga AAP vs BJP political row chuan Zirtawpni khan Delhi Chief Minister leh Punjab Chief Minister Bhagwant Mann tena party worker te protest march an zawm avangin a nasa zual zel.
Protest march neih hmain ED tena tum nga an kohna hnawl leh hmaktu Kejriwal chuan BJP-te chu Punjab mayoral election tichingpenah a puh a. “Inthlan tenauah pawh hetiang an tih theih chuan Lok Sabha leh Assembly election-ah phei chuan an tithei zual ang” tiin a sawi.
“BJP-te tan Democracy hian pawimawhna a nei lo, thuneihna duhin ram hi an hralh mai ang. Kan ram an tihbuai hi kan remti lo” tiin Mann-an mipuite chu democracy humhim tura ngenna siam hnuah Kejriwal chuan a sawi a ni.
Delhi-a AAP tena lungawilohna an lantirah mi an tam hle a, national capital street-ah party flag vaiin BJP-te chu slogan nen an aukhum bawk a. Hmun tam takah chuan AAP worker-te chuna Delhi Police barricade-te chu an nawr sawn a ni.
AAP te chuan peaceful protest neih an tum chu phalsak an nih loh thu sawiin, senior leader minister Atishi leh Saurabh Bharadwaj-te chuan BJP-te chu Kejriwal hlauah an puh bawk.
AAP-te chuan an party worker tam takte chu lungawilohna lantirnaa an tel tur khapsak leh tihkhawtlaiin an awm an ti bawk a. Police-te chuan border point-ah mipuite chu an lo dang tiin an sawi bawk a. AAP worker thahnem tak chu manin an awm bawk.
Hetihlai hian BJP-te chuan AAP leh Kejriwal-te chu Enforcement Directorate-in thu zawhfiah tura a koh mek laia victim card khelah an puh a. BJP worker-te chuan hmun thenkhatah AAP-te kawngzawh beihlet nan kawng an zawh ve tho bawk.
Delhi police-te pawhin hmun pawimawh laiah security tikhauh zualin, chung zingah chuan Chief Minister chennate AAP leh BJP HQs te pawh a tel a. Lungawilohna kawngzawh avang hian traffic jam a nasa hle a, police leh paramilitary personnel sang tam tak tirhluh an ni.
Delhi Education Minister Atishi chuan Chandigarh election-ah inbumna a awm tia sawiin BJP-te chuan an party AAP chu an hlau takzet tiin a sawi.
“Delhi-ah barricade tam tak siam a ni a, Bus khata volunteer chuangte chu man an ni a, AAP office pawnah para-military force za tel an awm a. Eng vangin nge BJP-te hian Chandigarh mayor election protest chu an hlauhawm em em?” tiin X-ah a post a.
Kejriwal chuan he post hi repost chhawngin vote-te chu rukin a awm a ti zui bawk a. “Mipui tena peaceful protest an neih tur chu Delhi hmun hrang hrangah tihtawpsak tuma hmalak a ni zui” a ti bawk.
Delhi Health Minister Saurabh Bharadwaj pawhin BJP-te chu vote tichingpenah a puh bawk a. “Ram pumin BJP tena Chandigarh-a vote an tihchingpen dan an hria. Lungawilohna lantirna neih hmain kan MLA, councillor leh party worker-te chu man an ni. BJP-te hian Arvind Kejriwal an hlau takzet” tiin a sawi bawk.
BJP-te chuan chhang let nghalin national spokesperson Shehzad Poonawalla chuan, “Arvind Kejriwal engmah thup tur i neih loh chuan eng vangin nge ED te hmaah i inlan mai loh? Anna Hazare thuihhruai Kejriwal kha i ni lo em ni. A hmasa berin i bang ang a, investigation neih zui tur a ni a. Mahse, investigation neihah i thawhpui duh tlat lo” tiin a sawi bawk.
Poonawalla chuan Kejriwal telna INDIA bloc pawh hmer tel nghalin ‘an tanho theihna chhan chu commission leh corruption vang a ni a, mission emaw vision emaw vang a ni lo’ tiin a sawi bawk.
Tunkarah Chandigarh mayoral inthlanah AAP-Congress alliance te chuan number ang chuan an ngah tawk a, mahse, vote li in an chak lo va, a chhan ber pawh Kejriwal party vote pariat chu a chhan sawi si lova vote thia chhiar a nih vang a ni.
AAP leh Congress-te chuan Supreme Court-ah pawh an zualko nghal a. Senior advocate Abhishek Singhvi chuan Chief Justice DY Chandrachud-an ngaihtuah a ni ang tih thu a sawi zui bawk.