Abbas-a’n an kuta Gaza hlan turin Hamas a ti

Abbas-a’n an kuta Gaza hlan turin Hamas a ti
Mahmoud Abbas-a chuan Hamas-te chu ‘ui fate’ tia kovin Israel nena an indona a tawp theih nan an mi hrente chhuah vek tur te, an ralthuam dah tur leh Gaza pawh an kuta hlan turin a ti.
Palestinian Authority president hian West Bank-a an thutkhawmnaah Hamas hian Israel-in Gaza an beih chhunzawm theih nan ‘remchang’ a siamsak niin a sawi a, ‘mi hrente chhuahin ti thuai rawh u’ a ti bawk.
Thla 18 kal taa indona a chhuah hnuah president-in Hamas laka thu a sawi nat ber a la ni.
Hamas hotu lian erawh chuan Abbas-a chu a mite ngei lakah ‘tawngkam uchuak tak hmang’ niin a sawi.
Kar hmasa khan Hamas hian Israeli-te inkahhai rawtna an hnawl a. Chawlhkar ruk inkahhai kalpuiin an ralthuam dah vek tur leh mi hren 59 an la neih zinga 10 chhuah ni se tiin an rawt.
Hamas hian mi an la hrente chu indo tawp nan leh Gaza atanga Israeli chhuah vek thleng nan an duh tih an sawi a. Ralthuam tun vek chu an tum lo.
Abbas-a kaihhruai PA hian kum 2007-a Hamas-ten Gaza an thunun atang khan West Bank chauh an thunun tawh.
PA hruaitute hian indona a tawp hnua Gaza enkawl an hreh loh thu an lo sawi chhuak zauh zauh tawh a; mahse, Palestinian tam tak chuan an buai meknaah awka an chhuah lo lutuk chu an dem thung.
Abbas-a hian Ramallah-a Palestinian Central Council thutkhawmah Hamas hi na takin a bei a. “Israel-in Gaza Strip an beih let chhan tur tha tak an siamsak a, heng zingah hian mi hren an la kawl tlat chu a tel,” a ti.
President hian Hamas chuan Gaza mawhphurhna leh an ralthuam chu PA hnenah ‘hlan ngei rawh se’ a ti a, a hnuah political party-ah insiam turin a ti bawk.
Hamas political bureau, Bassem Naimchuan Abbas-a thu sawi hi demin ama mite ngei thinlung a tina niin a sawi.
Hamas leh PA hi kum tam tak lo iner tawh niin West Bank leh Gaza-ah Palestinian hruaitu intawm pawh a awm theih loh phah.
Hetih lai hian Hamas military wing chuan Nilaini khan video tichhuakin Israel-Hungarian an hren kum 48 mi, Omri Miran-a leiverh chhunga a awm lai an tilang.
Israel hian March 2 atang khan Gaza-a puihna thil luhna chu a dang a, chawlhkar hnih hnuah Hamas-ten an mi hren an chhuah theih nan sipai chakna hmangin a bei thar leh.
Hemi hnuah hian Gaza-ah hian Palestinian 1,928 thah an ni leh tawh niin Hamas enkawl health ministry chuan a sawi.
Israeli sipaite hian October 7, 2023-a Hamas-ten Israel luhchilha mi 1,200 chuang an thah leh hren tura mi 251 an hruai phuba lak nan a bei let mek.
Indona a chhuah hnuah Gaza-ah hian mi 51,300 an thi tawh niin health ministry chuan a sawi.