Aikal lak a tawp thawkhatah kan ngai – DP&AR minister

Mizoram sawrkarin a hnuaia thawktea aikal lak tihtawp a tum chu an chingfel thawhkhatah an ngai tih Department of Personnel & Administrative Reforms minister K Sapdanga chuan a sawi.DP&AR minister chuan an sawrkar hlimah department tina aikal awm zat an survey a, la zat leh an lak chhan inzawtchhuakin, mi 3365 an awm niin report hmasa berah hian hriat a ni a. Sawrkar hnathawk ni lo mi 3365-in sawrkar thuruk, file leh engkim an lo khawih thin tih a lan tak avangin, state dangah pawh an tih duh loh aikal lak chu tihtawp tumin bul an tan chho ta tih a sawi.
Hun bithliah neiin in report turin an ti a. Sawrkar officer-ten sawrkar thuchhuak an bawhzui tha a, Mizoram sawrkar hnuaia aikal la zawng zawngten aikal lak titawpin an hna an zawm kim tawh, tih chu tuna report an hmuh dan a ni tih a sawi. “Report dik lo pe an awm a nih chuan, puan lawk tawh angin, controlling officer-te mawhphurhna a ni anga, departmental proceeding hial lak a ni ang,” a ti.
Chutihrualin thuthang an hriat danah aikal la ni chiah loa inngai, la ni si an awm nia an hriat thu minister hian a sawi a. Sawrkar hnathawh dan pangngai baka mahni remhriatnaa lo thawk ringawt kha an pawm dawn loa, sawrkar hna thawk tura lak ten lak an nih ang taka an thawh kha a dik a ni mai a, chumi piahlam, aikal rim nam ang chi chu pawm a ni dawn lo tih a sawi.
Department thenkhatah aikal thatpui zawkna leh aikal lak avanga harsatna tawk an awm a nih pawhin, hemi avanga inngaihnathiam erawh thil remchang a ni loa, dan lo a nih avangin tihtawp tur a ni ringawt mai tih K Sapdanga hian a sawi.
“Tui sem a ni emaw electric ban lawn a ni emaw school-ah pawh nise, a tan tirah chuan harsatna eng eng emaw a awm ang tih kan ring. Chumi paltlang ngam loa dik loa kal reng kha tha kan ti loa, hna thawk thei si lo, hlawh nei thei bawk si kha sawrkar tan hlohna a ni a, hlawh kan neih theih chhan chu hna kan thawk tur a ni. Hna thawk tlak lo nih vanga aikal lak chu chawlhtir theihna dan tam tak a awm a, a engemaw ber hi hman mai tur a ni ang. Aikal chungchangah sawrkarin hnung tawlh a tum loa, harsatna a awm a nih pawhin tun leh nakin hun zel atana kan thatna atan aikal lak hi tihtawp a tum,” a ti.
DP&AR commissioner K Lalthawmmawia sawi danin, ni 30 chhunga aikal la tihtawp tura hriattirna an tichhuak a. Hemi hnu ah ni 15 chhungin compliance report pe turin department tin an ti leh a, an dawng kim tawh. A tira aikal lak report nen a inmil em tih report atang hian an en a; department tin deuhthawah a inan lohna a awm deuh vek. Aikal report tur tiha an hming tel si, compliance report-a lang ta lo; a tira report tura tiha lang lo, compliance report a lang leh si an awm a. Tuna compliance report hi chu rintlak viau tawh turah an ngai.
La zawm lo an awm em tih te department tin an inzawt leh mek a. Aikal la, hna la zawm lo report an awm zeuh zeuh a, zawm loh chhanah – pension hman tawh, thi tawh, leave la mek bakah awmna chin hriat loh report pahnih khat awm tih a sawi.
“Dam lohna, chhungkaw harsatna avang leh chhan dang avanga zawm thei ngang lo an awm dawn tih rin lawk a ni a. Sawrkar hnathawk hnena danin phalsak angin leave an neih ang ang an la thei anga, a tawpkhawkah chuan ‘without pay’ in ‘extra ordinary leave’ tih te a la awm. Chhan rintlak tak vang ni lem lo, zelthel vang leh kawhmawh bawl duh pawh an awm thei a, chumi daikhalhna tur chu siam niin, a pawnga taka sawrkar hnathawkten leave an lak ngawt theih loh thu, kan dikna chanvo a nih kher loh dan te hriattirna tihchhuah a ni tawh,” DP&AR commissioner hian a ti.
Leave lak theih zawng zawng la zo tawh, la kal thei chuang lo tan sawrkar dan zam lawk – invalid pension leh voluntary retirment a awm a. Pension rules leh leave rules awmsa hmang tangkai thei lo, an service-in a la phak loh emaw a condition-in a huam ve loh a awm theih avangin Council of Ministers thuthlukna in ‘special voluntary retirement scheme’ siam turin Drafting Committee din a ni a, an rawtna sawrkarah thehlut tawhin, Council of Ministers vekin a pawm leh tura chhawp a ni dawn tih a sawi. Heng kawngka hawnsaa chhuak duh lo lui tan dan awmsa hnuaiah tho, ‘pre mature retirment’ a awm tih pawh sawiin, public interest-a retire tawh turin a ngaihtuahtu Committee-in a ti thei, hei hi Central Civil Service Pension leh Fundamental Rules-a awmsa a a ni tih a sawi.