airabi SDO(C) office hawng

Kolasib district-a Bairabi Civil Sub-Division thar chu Zirtawpni khan chief minister Zoramthanga’n a hawng a. SDO (Civil) office building thar leh Civil Sub Division thar lungphun a hawn hnuah a lawmna inkhawm hi NF Railway platform-ah buatsaih a ni.
Chief minister chuan hun rei tak an lo beisei tawh Civil SDO an neih tak avangin Bairabi mipui lawmpuina a hlan a. Kan sawrkar hian hmasawnna hnaah pawh inrelbawlna lamah pawh kan ramin a mamawhte tih hlawhtlin zel a duh tih a sawi. Tunah a thar mai a la nih avangin tihhmasawn zelna tur tam tak a la nei a, office building lian tak, a tul ang zela department hrang hrang inbun ve theihna tur te, quarters tha zawkte mamawh a la dawn tih a sawi a ni.
“Bairabi hi a pawimawh em avangin hrilengin min tuam lai pawhin a tihhmasawnna tur sum in dawng tha thawkhat hle a, Mamit lam panna kawng, Zamuang lam kawng, Kolasib lam kawng, Hailakandi lam kawngpui leh Tlawng lui lian laka invenna pawh, hmalakna tam tak kan nei a ni,” a ti.
Kolasib bialtu MLA, minister K. Lalrinliana leh Kolasib district bawrhsap John LT Sanga ten thu an sawi a. Bairabi Joint Village Council chairman R Lalfakawma’n khawtlang aiawhin lawmthu a sawi a ni.
Sawrkar hotute sawi danin, SDO (C) chelh tur hi hun reiloteah sawrkarin a tihchhuah beisei a ni a, a thar awm hma atan tuna SDC Bairabi ni mek Dr Lalramdintluanga, MCS chu he mawhphurhna lo chelh lailawk tura ruat a ni.