Aizawl-Agartala air service duh leh Tripura-ah restricted tender hre ve lo

Agartala Mizo Welfare chuan Aizawl – Agartala inkara thlawhna service awm leh se an duh tih an sawi a. An state sawrkar kalphungah restricted tender tih hman a nih awm an hre ve lo tih an sawi.Mizoram sawrkar huaihawta Mizoram Journalists’ Association member thenkhatin tunhnaia Tripura an tlawhnaah Agartala-ah Mizo Welfare hruaitute hian an lo kawm a. Aizawl – Agartala thlawhna service thin chu nikum khan tihtawp a ni a, zirlai, missionary leh zin veivak thin dangte pawhin harsatna an tawh phah tih an lo sawi.
Aizawl- Agartala thlawhna service tihtawp vang hian, thlawhna hmanga kal a tul changin Rs. 1500 chauha Agartala thleng thin khan Rs. 5000 vel sen a tul ta a, thlawhna service a awm leh theihna turin Mizoram sawrkarin hma laksak thei se an duh tih an sawi a ni.
Mizo Welfare hruaitute sawi danin, 2009 August 15-ah an indin tan a, member 350-400 vel an awm mek. An member zinga chhungkaw 10 vel chu Agartala-a awm nghet an ni. Kumtin Chapchar Kut an hmang thin a, kuminah pawh April 11 hian hman an tum. Mizo hnam lamin hlut a hlawh a, state sawrkar hun pawimawhah an entir thin a, hnam lam hmang hian sum an hailut tam viau tawh a ni.
Mizo Welfare hruaitute leh member zingah sawrkar hna sang tak tak thawk an awm a. Tripura sawrkar kalphung tlangpui an sawi danin, Mizoram lama lar tak restricted tender chu an hre ve ngai loa, eirukna kawngah Tripura chu a la ziaawm viau niin an hria.
Hna tha lo deuh nia lang chu mipui lamin High Court-ah an thlen nghal mai zel avangin hnathawktu thlan kawngah diklo takin thil a tih theih loh tluk a ni a, restricted tender phei chu tih ngam a ni lo tih an sawi.
Sakhuana kaihhnawihah harsatna an tawh leh tawh loh zawhna chu, harsatna an tawk ngai lem lo tih an sawi bawk