Aizawl chhehvelah Bawng natna hri

Aizawl leh a chhehvelah bawng natna chi khat, Lumpy Skin Disease a leng mek a. Sihphir, Durtlang – Zuangtui leh Lengpuiah he natna kai hi an awm chiang tawh tih finfiah a ni.
Thudawn danin, Aizawl leh a chhehvela bawng natna chu AH & Vety department chuan Bhopal-a ICAR- National Institute of High Security Animal Diseases ah an taksaa tuihnang sample thawnin enfiah a ni a. Bawng natna chi khat, Lumpy Skin Disease (LSD) tih finfiah a ni. He natna vei mek bawng awmna hriatchian tawh – Sihphir Venghlun, Durtlang, Zuangtui Road, GCS Road leh Lengpui Mosia Farm chu ‘affected area’ ah a puang nghal a ni.
The Aizawl Post-in a zawhchiannaah AH & Vety department hotute sawi danin, he natna hi bawng bakah kel leh beram hote pawhin an kai ve thei a. Thisen dawt thei chi thosi leh tho lam atanga inkaichhawn theih niin, he natna vei rante chu an taksa a bawl, a pan zui a, khawsik sang leh chauhna a thlen thin a ni. A pui tan an hnute tui a tihtlem bakah thihna hial thlen thei a ni. Viral disease a nih vangin inkaichhawn a awl em em tih an sawi bawk.
He natna hi ran atanga mihringa kaichhawn theih a nih awm hriat ala ni loa, he natna vei bawng hnute atang pawhin a kai theih awm hriat a ni lo. Chutihlaiin, bawng note chuan a nu hnute atangin a kai thei thung a ni.