Aizawl City Centre sak mek enfiah

Aizawl New Market hmuna sak mek Aizawl City Centre leh Aizawl City Centre Annexe chu Nilaini khan Mizoram State Project Monitoring Committee Team ‘B’ leh ‘C’ chuan an vice chairman R Lal Rinawma hoin an enfiah.
Aizawl City Centre hi cheng vaibelchhe 42.82 senna tur, sak lai mek a ni a. UD&PA department hnuaia Aizawl Smart City Limited-in a sak hna hi enkawlin, contractor-ah Lushai Engineers Aizawl hman a ni. He hna hi January 2023 khan tanin, 2025 November 30-a zawh tura ruahman a ni. A hna hi zaa 38 vel zawh tawh a ni.
State Project Monitoring Committee hian hna hi uluk taka endikin, chak zawk leh tha zawka hna kalpui dan tur nodal department leh contractor-te an sawipui a. An harsatna tawh pawh sutkian dan tur an sawiho bawk.
Aizawl City Centre Annexe hi NEDP sum vaibelchhe 36.41 senna tur, sak mek lai a ni a. Nodal department chu Commerce & Industries niin contractor hi Lushai Engineers Aizawl a ni. He hna hi 2020 June 24-ah tan a ni a, tunah hian hna zaa 75 vel zawh tawh a ni. Heng building pahnih hi dawr leh thlai thar zawrhna hmunpui tur a ni.
MSPMC hian helai hmun hi an vawihnih tlawhna a ni a. Nodal department-a officer leh an thawhpui bakah contractor-ten an lo dawngsawngin an tawiawm a ni.