Aizawl district-a Khawpuar in lo hal hunah hal hman lo

District Level Committee on Fire Prevention Aizawl chu kangmei chhuak thei ven kawnga hmalakna thlirletin Thawhtanni khan chairman, district bawrhsap Nazuk Kumar hoin an thukhawm.
Committee member secretary, DFO Aizawl Lalnundanga Khawlhring report danin, kumin kumtir leh tun inkarah kangmei chhuak vawi 308 chhinchhiah a ni a. Kangmei chhuak hian ram hectare 498. 61 a tuam. Lo hal hun tur ruatah thingtlang khua ten lo an hal deuh vek a, Khawpuar chiahin lo hal hun bituk pelhah lo an hal. He dan bawhchhiatna chungchangah hmalak dan tur pawh rel nghal a ni.
Bawrhsap chuan kangmei chhuak tur ven kawnga mipui zirtirna kalpui chu a tha thawkhatah a ngai tih sawiin, tan lak chhunzawm erawh a ngai tih a sawi a. Line department ho pawh thawhhona tha an neih chhunzawm a pawimawh tih sawiin, thingtlanga ram kang venhim kawngah hmalakna kalpui ang thoin Aizawl Municipal huamchhungah pawh he hmalakna hi chak zawka kalpui a ngai tih a sawi a ni.