Aizawl district-ah HIV kai hmuhchhuah tlahniam hret

District AIDS Prevention and Control Units Aizawl chhut danin, Aizawl district bikah kum 2018 atanga kumin thlenga chhinchhiahna hrang hrang an neihah HIV kai hmuhchhuah an tlahniam hret hret.
HIV leh inpawlna atanga natna dang darh zel tur venna kawnga hmalakna beihpui, ‘IEC Campaign on India Fight against HIV/AIDS and STIs’ kalpui dan tur relin Aizawl District AIDS Prevention and Control Committee chu an chairman, bawrhsap Er. Lalhriatpuia hoin Ningani khan an thukhawm a.
Chairman chuan inzirtirna tha leh mahni inthunun theihna hmanga hneh theih natna, HIV kai tam lama ram puma hmahruaitu kan ni chu veiawm a tih thu a sawi a. Inkaichhawnna tichat turin he campaign hi hlawhtling taka hman a pawimawh tih a sawi. Campaign chhung hian HIV hrik inkaidarh dan leh a inven dan inzirtir bakah a hrik kai tawhte tha taka enkawl theih an nih dan inhrilhhriat tel a pawimawh, tin, Aizawl khawpui pawn thlenga tuam theih nan ruahmanna kalpui a tul tih a sawi bawk.
Thutkhawma tarlan danin, IEC Campaign hi kumin September chhung kalpui tur a ni a. HIV la kai lo te him zel nana zirtirna tha pek leh a kai tawhten hriselna tha an neih theih nan leh midang an kaichhawn loh nan inenkawlna tha pek chu a tum ber a ni. Zirtirna kengtel inelna – debate, quiz, placard siama intihsiak, photo booth insiam siak, flash mob dance-a inel leh rally-te neih tum a ni.
DAPCU district programme manager Dr R Zonunmawii report danin, Aizawl khawpui chhungah kum 2018 atanga 2024 chhung hian chhinchhiahna hrang hrang atangin, HIV kai hmuhchhuah thar a tlahniam hret hret a. Kum 2018- 2019 khan HIV kai hmuhchhuah 2141 an nih laiin, 2023- 2024 khan 1373 hmuhchhiah an ni. HIV hrik kai zaa 64.4 chu inpawlna atanga kai an ni.