Aizawl East-II ka tlanchhiat san lo – Robert Romawia

Aizawl East-II bial chu a tlanchhiat san loa, Hachhek bial mipuiin ruling bialtu neih an chak ve tawh avangin an party Nomination Committee thu angin a kal tih Robert Romawia Royte chuan a sawi.
Thawhtannia Mizo Hnam Runa inkhawmah MNF adviser Robert Romawia Royte chuan Aizawl East-II bial a tlanchhiat san loh thu leh a hnunga MNF candidate tan a rochun zawk thu a sawi. An party Nomination Committee-in MNF candidate tur uluk takin an thlang ang tih a rin thu leh Aizawl East-II bialah hian hneh takin an party candidate a tlin a ring tih a sawi.
A dinna tur Hachhek bial mipuiin ramri leh hard area-a awm an nih avangin, ruling party bialtu neih an chak ve tawh nia sawiin, “Aizawl East-II ai chuan bial a hahthlak dawn tih pawh ka hria a, mahse vuivaiah ka la lo. Politics-a ka luh hian khawi bialah pawh ding turin ka inpeih sa hrim hrim a ni,” a ti.
ZPM chu Nomination Committee an thu a, an danpui an bawhchhe nghal nia sawiin, “Lungawi lo thlemtu committee an ti a, a thlemtute pawh an lungawi chuang lo. Han kehdarh lo chi an ni lo. MLA ding tur an thlan danah social media follower ngahte a ni a. Tunah hian ZPM lam chu an beidawng tan a. Party pariata awm lawr tawh hi chief minister atan thlantlin an la awm lo,” a ti.
Mizorama Congress sawrkar laiin lapse pui (mega lapse) vawi hnih a thleng tawh tih Robert Romawia hian a sawi a. Financial management-ah expenditure management a pawimawh ang bawkin income management a pawimawh tih sawiin, kum 10 sawrkar tawh leh tun term sawrkar income chu intam hleih tak a ni tih a sawi. Neih sa tlemte renchem aiin source dik tak atanga thawhchhuah tam a pawimawh zawk, tiin, a inren pun theih loh a, income capacity tihsan a ngai, tiin a sawi bawk.
“Sawrkar tha tehna chu manifesto tihhlawhtlin kawngah a ni. Opposition party-ten kan manifesto-ah min teh rawh se. Congress chuan manifesto kan inziahthat siak an ti a nih kha. Pu Zoramthanga sawrkar hi manifesto tihhlawhtling tam ber a ni a. Kan manifesto pawnlama kan thawh ringawt pawh hi Congress kum 10 sawrkar chhung ami a zat tawh hial ang,” MNF minister hian a ti.