Aizawl FC an chak

August 30, Zirtawpni khan LZ Juice MPL 11 round 8-na khelh zawh a ni a, Aizawl FC chuan SYS FC an hneh Chanmari FC nen an inkar an tizim. Zirtawpni a inkhel dangah Chawnpui FC chuan Sihphir Venghlun FC an hneh ve bawk.
MPL 11-ah tlawm nei lova kal mek Aizawl FC hian round 8-naah SYS FC an hmachhawn a, Lalhriatpuia leh Lalbiakdika te goal thun hmangin hnehna an chang a. SYS FC goal neih chhun hi minute 70-naa F Malsawmtluanga thun a ni. He inkhelah hian Aizawl FC tana khel tha tak Lalhriatpuia chu Kuriz man of the Match-ah thlan a ni.
SYS lakah an chak leh tak vangin Aizawl FC hian hmahruaitu Chanmari FC nen an inkar chu an tizim a, hmahruaitu nen an inthlahna hi point hnih a ni. Round 8 na thlenga tlawm an neih loh vangin Aizawl FC tan semi-final a hnai leh zual sauh.
Zirtawpni a inkhel hmasa zawkah coach thar nei Chawnpui FC chuan 1-0 in Sihphir Venghlun FC an hneh.