Aizawl FC tan fiahna hnuhnung

Zanin dar 7:00 hian RG Stadium, Mualpuiah inkhel pawimawh zet mai a awm dawn a. I League khel chhunzawm tura chak mamawh Aizawl FC in Namdhari an mikhual dawn. Namdhari an hmchhawn tur hi thih leh dam kara leng Aizawl FC tan fiahna hnuhnung a ni dawn.
I League-a Mizo team awmchhun ni rih Aizawl FC hian khelh khelh 21 atanga point 20 hmuin team 12 zingah 10-na an ni mek. Khelh inzatah an hnuai chiaha awm SC Bengaluru nen an point hmuh zat a inang. Aizawl FC hian Namdhari lakah hnehna an chang a nih chuan inkhel dangah SC Bengaluru chak pawh nise Aizawl FC an him ang a, SC Bengaluru an tlahniam thung ang. Aizawl FC leh Namdhari te hi an tlawm ve ve emaw, an khingpuite nen an inhnehtawk ve ve emaw a nih pawhin head to head ah Aizawl FC chan a tha zawk a, him zawk an ni dawn. Chutihlai chuan Aizawl FC hi an mikhual Namdhari lakah an tlawm a, SC Bengaluru in Sreenidi Deccan an hneh emaw an draw emaw a nih chuan Aizawl FC an tla thung dawn. RG Stadium-ah ngei Aizawl FC an tla a nih chuan Mizo player, Mizo naupang, Mizo nula leh tlangval, football ngaina em em Mizote mittui a tla dawn.
Tarlan tawh angin Aizawl FC leh Namdhari te hi zan dar 7:00 an an inkhel tan dawn a. An inkhel rual chiah hian Sreenidi Deccan leh SC Bengaluru te an inkhel ve dawn bawk. Zanin dar 7:00 atang hian football ngainatuten Mualpui leh Hyderabad an hawi tawn sek dawn.
Aizawl FC in an mualah fiahna hnuhnung, fiahna pawimawh zet mai an hmachhawn dawn. Hnehna chang turin player te an tang a, hnehna an chan theih nan team hruaitute an tang viau bawk Aizawl FC an player te au phur a, chakna thahrui pe turin mipui pawimawhzia an hria a. A hmuna inkhel en vek turin mipuite an tahawh a, inkhel en turin kaichhan an sawm. Football atchilh Mizo mipuite RG Stadium-ah an pungkhawm dawn a, point thum hmu turin mualchhunga player leh khelmuala mipuite an tangrual dawn. Chu hmunah chuan nang i kal ve dawn em? Nge.. Mizo club in an mamawh lai chein i mutsan dawn?
Aizawl FC vul zel la
India rama football club te inelna sang I League-ah Mizoram team neih chhun chu Aizawl FC an ni a. Mizo footballer tam takte lo chawisang tawhtu Mipuite club hi a hlut tehlul nen Mizo mipui ten an hlut zo tlat si lo. Football ngaina Mizo ten kan hawiher kan thlak danglam a, Aizawl FC hi kan hlut zual deuh deuh a, tha leh zuala kan tawiawm a tul ngawt mai.
Mizo rama football khel thin, football tui-pui tute zawng zawng Mizo club-ah eng club nge an zawm chak ber tih zawt ta ila, Aizawl FC an tih deuh vek a rinawm. Mizo footballer ten Aizawl FC-ah khelh an chak em em vek a. Nu leh pate pawhin an fate khelh nan Aizawl FC hi an duh em em vek. Hei hi a chhan chu hun rei tak I League-a Mizo club awmchhun an nih vang a ni a. Indian Super League (ISL) khel thut thei dinhmuna ding an nih vangte pawh a ni tel ang. Chumai a ni lo, Football-a ei zawng tura rahbi pawimawh tak, kailawn hmasa a ni tlat a ni.
Aizawl FC atang hian Mizo player eng emawzatin ISL club an zawm theih phah a, 1 League club dang zawm an teuh tawh bawk. Mizo player thahnem tak hi Aizawl FC vanga club lian leh hlun zawka khel a, hlawh tha tak hlawh theite an ni hlawm. AFC atang hian player puitling thahnem tak an chhuak tawh a. Naupang thahnem takin Aizawl FC atang ngei hian bul an tan mek bawk. He Aizawl FC hian India football khawvelah Mizote a tihmingtha a ni mai lova, Mizo player thahnem takin hlawhtlin nan an hmang a. Chhungkaw engemawzatin income tha tak an neih theih phah, a hlu a sin aw!
Lengpui Airport in khawpui lian leh changkang zawkte min dawh zawm ang chiah hian Aizawl FC hian football club lian leh hausa zawkte a dawh zawm a. Tun dinhmunah chuan Mizo nu leh paten kan fate khelh nan Aizawl FC hi kan duh ber a, player te zawm chak ber pawh a ni mek rih, Mizoram chhungah bik chuan. Chutihlai chuan kan fate khelh nan kan duh, player te pawhin khelh an chakna hi kan hlut lo va, kan tan tawk lo va, an inkhel en pawh kan tam ngai chuang tlat si lo! Kan mak ve e!
I League-a Mizo team neih chhun Aizawl FC chak loha lo lawm tlatte kan awm a. An chetthat loh chungchang sawi nuam ti tlattepawh kan awm. I League-a hmachhawn tura senso hautakzia hriatthimpui map lovin kan sel a, kan nuih a, diriam lah kan hreh lo. Tiang zingah hian an fate Aizawl FC khel an awm lo a ni mai lo ang, an hmelhriatte Aizawl FC-a khel phak an lo hrim hrim a ni thei ang. Mah se, an tu leh fate, an thenawmte emaw, an veng tlangval/naupang emaw Aizawl FC-a tel phak awm ta se an ngaihdan an leh an hawider a danglam daih thei thung si ang: Kan sawi mek hi Aizawl FC chungchang a ni naa Aizawl chungchang chauh a ni lo thung. I League a ni emaw, ISL-ah a ni emaw Mizoram atanga tel phak an awm hrim hrim hi a hluin a ropui thlawt. Aizawl FC an ni emaw, Chanmari FC an ni awm. Tawngkawlong FC pawh ni raw sek sek an hlutzia kan chhut thiam a, kan ngaihhlut a, kan tawiawm that a tul tak zet.
I League ah Mizo team tel phakte chhuan nachang kan hre lo a nih chuan I League-ah Mizo team tel phak awm miah lo ta se a chhuanawm chuang bik hauh lo ang. Manipur club leh Kerala club te Mizote tan zu chhuan em em thu va awm suh! I League-a Manipur team emaw, Meghalaya team emaw ngawt ai chuan Mizoram atanga team lo awm hi Mizo player leh Mizo naupangte tan chhawrna tur a tam fe zawk. Aizawl FC tan senior team bakah hian I League-ah Under 13 te, Under 15 leh Under 17 adt. team an awm a. Tunah ngei pawh Shillong lamah Mizo naupang engemawzatin I League U-13 an khel mek nghe nghe. Football a eizawn tumte tan a hluin, bul tanna tha zet mai a ni. Mizo naupangte hmabak tiengtu chu Aizawl FC hi an ni mek.
Football ngaina Mizote hian football khawvel daidar tura kailawn pawimawh tak Aizawl FC tan hian a tha lamin ngaihtuah zau zawk i seng thar teh ang u. Kan phak tawk theuhah thahnem kan ngaih tlan chuan rah-chhuah tha zawk a nei ngei ngei dawn si a. Mizo play te tan, Mizo naupang te tan, Mizo mipuite tan Aizawl FC vul zel rawh se.