Aizawl kawngkama chawhmehzuarte insawnna tur ngaihtuah

Aizawla chawhmeh zuar, kawngkama thu thinte thutna tur hmun rem zawk ngaihtuahin Urban Development & Poverty Alleviation minister K Sapdanga hoin a kaihhnawih sawrkar hotute an thukhawm.

Tennis Court bul kawngkama chawmhmeh zuara thu thinte harsatna sukiang tur leh an thutna tur hmun dang ngaihtuahtu Working Committee din nise tia rel a ni a. Convenor-ah Aizawl Municipal commissioner niin member-ah Aizawl bawrhsap, SP leh Traffic SP ruat an ni.
An ni hian Aizawl khaw chhung veng hrang hranga chawhmeh zuara kawngkama thu thinte traffic tibuai lo leh felfai zawka an thut theihna tur hmun an ngaihtuah dawn bawk a ni.
Aizawl khawpui kawngpui kam leh footpath-a chawhmeh pho leh zawrh thin chuan lirthei chetvelna a tihbuai bakah mihring kalna tur a dal thute, kawng a chep phah avanga lirthei khalhtute, kawngsira thute leh kawnga kalte tan a him loh thu sawi a ni a. AMC-in veng hrang hranga market a sak pawh luahkhah loha an awm mek thu sawi a ni.
Sawrkar official-te bakah hian Tennis Court chhehvel ni lo, kawngkama chawhmeh zuar thinte thut thinna huam ami Khatla leh Tuikhuahtlang Local Council aiawhte an tel bawk.