Aizawla bawngsa zuar hnamdang May 13 hnu ah zuar lo turin chah

An inner line permit (ILP) in a phalsak ang nilo Aizawlah bawngsa zuar hnamdang an tam a, danin a phalsakna dang a awm loh bawk avangin heng mite hi kumin May 13 hnulamah chuan sa talh tawh lo turin an phut tih tualchhung mi bawngsa zuarte chuan an sawi.
Mizo Bawngsa Zuar Association hruaitute chuan hnamdang mi Aizawla bawngsa zuarte hi a tirah chuan an hnena bawng vun leia rawn kal thin an ni tlangpui a, a hnu ah hetiang hian an sa zawrhna dawhkan hmaah dawhkan an rawn hun hnan ta mai tih an sawi. A hranpa in state sawrkar emaw AMC atangin emaw sa zawrh phalna an nei loa, an ILP chhuichianin cement mistiri, helper leh construction work danga thawk tura Mizorama rawn luh phalna nei, sumdawnna dang khawih tura phalna nei lo an ni tih an sawi a ni.
Inchimralna kawng hrang hrangah sumdawnna hmanga inchimralna chu state danga ram leilung fate pawhin an tawrh tawh thin a nih angin, bawngsa zawrhah pawh hian ram leilung fate eizawnna chu zawi zawiin an la rawn luahlan mai a hlauhawm tih an sawi a. Heng sa zuar hnamdangte hian an chhawr chhawn pawh anmahni hnampui vek an ni a, tualchhungmi chuan ram leilung fa an chhawr vek zawk a, thangthar lo la awm zel tur ram leilungfate tan, an sumdawnna kawng lo hawnsakna tur a ni tel tih an sawi a ni.
Mizo zingah bawngsa zawrh kawnga hnamdang thurualpui leh hming hawhtir pawh an awm tih Bawngsa Zuar Association hian an sawi a. Heng, dan loa bawngsa zuar hnamdang leh an thurualpuite hian May 13 hnulamah chuan chhunzawm tawh lo turin an duh tih sawiin, an ngenna ngaipawimawha tilui lo turin an ngen lawk tih an sawi a. Vengtin local council, YMA leh veng mipuiin an hmalakna hi thlawp turin an ngen tih an sawi bawk.
Association hruaituten zawhna an chhan danin, bawngsa zuar hnamdangte hi Zarkawt, Dawrpui Vengthar, Chanmari, Chaltlang leh Thuampuiah an awm a ni.