Aizawlah ‘Midnight Hot’

American synthwave band ‘The Midnight’ chu February 20 hian Brigade Field Bawngkawnah an rawn che dawn. Singer songwriter Tyler Lyle leh Tim McEwan te din ‘The Midnight’ hi tunlaia music ngaihthlak theihna hrang hrangah Mizo thalai pawhin an ngaihthlak nasat tak a ni a, hei vang hian event management firm pathum – Fame Entertainment, Thul leh Cicada Live tangho chuan Aizawlah an chah thleng dawn ta a ni. Cicada Live bik hi India rama foreign band hrang hrang chah lut tawh thin an ni.
Aizawla an concert turah hian VIP ticket leh a dang zawng then hran a ni a. VIP lei tan hamthatna chi hrang hrang duan a ni. Online leh off line-in ticket hi lei theih a ni a, online-a lei tan gate-a buaina awm miah lo turin an ruahman lawk tih a buatsaihtute chuan an sawi. Ticket hi thuang hnihin an zuar chhuak tawh a, an hralh zo ve ve tawh; tunah a thawh thumna atan an zuar chhuak dawn mek a ni.
The Midnight India Tour hi February 18-ah GYLT Bengaluru-ah tan a ni anga, Aizawl hi a pahnihna tur niin, February 22-ah Dimapur, Nagaland-ah, February 24-ah Bloomverse Festival, Meghalaya-ah an zai leh ang.