Aizawlah Photo Art Exhibition

World Photography Day kum 184-na pualin Ningani khan Mizoram Shool of Photography leh Photography Club of Mizoram buatsaihin Aizawla Millenium Centre-ah Photo Art Exhibition vawi 7-na neih a ni a, August 19 thleng a awh ang.
Exhibition hawngtu MP K Vanlalvena chuan thlalak chu document pawimawh a ni a, thua sawi maia fiah tawk loh changa finfiahna atan a tangkai tih a sawi. Thlalak leh mihring nun chu a inzawm tlat tawh bakah mi tam takin eizawnna’n hmang tih a sawi bawk.
A buatsaihtute sawi danin, he Photo Exhibition hi a duh apiang tel theih a ni a. Colour leh Monochrome section-ah thenin, thlalak 332 a lut a, mi 79 an tel. Pho chhuah tur hian thlalak tha zual 70 thlan leh a ni. Lawmman hi August 19 – World Photography Day ah sem a ni ang. Colour leh Monochrome a pakhatna hi national contest-ah an tel thei dawn a ni.
Exhibition chhung hian thlalak hi man tlawm zawkin a lei theih dawn a, thlalak print chi hrang hrang en theiha phochhuah a ni.
Mizoram School of Photography (MSP) hi kum 2017-a din a ni a, National Academy of Photography Kolkata pawmpui a ni. MSP atanga zirchhuakte hian Photography Club of Mizoram dinin, he Club hi Federation of Indian Photography hnuaia inziaklut a ni.
MSP atanga zir chhuak mi 100 dawnin photography hi eizawnna’n an hmang tawh a, ram chhung leh ram pawn thleng pawha photography hi eizawnna’na hmang an awm a ni.