Al-Qaeda zawm hel pawlin Mali khua leh sipai hmun la

Al-Qaeda zawm hel pawlin Mali khua leh sipai hmun la
Al-Qaeda nena inzawm pawlten Malian khua, Boulikessi beiin sipai awmhmun an chhuhsak.
Reuters news agency-in an thu dawn an tar lanah chuan Pathiannia inbeihna thlengah hian sipai 30 chuang an thi a, finfiahna erawh a awm rih lo.
Thawhtanni khan a beitu nia inchhal, Jama’a Nusrat ul-Islam wa al-Muslimin (JNIM) chuan khawpui hlui tak, Timbuktu-a sipaite pawh an beih thu an sawi a, mi chengte pawhin silai ri leh thil puak ri an hre hlawm.
Pathiannia inbeihna chhuak chungchangah hian Mali-a sipaite chuan ‘fimkhur taka beih an let’ thu an sawi a, ‘a hnuah tih dan tha zawk avangin an inhnukdawk’ zui tih an sawi.
“Mi tam takin an thawk tawp thlengin, Malian ram chhan nan an bei a ni,” tiin thu an chhuah.
Reuters chuan JNIM hian mi tam tak an that a, ‘sipai camp’ an luhchhuah vek niin a tar lang.
Video darh pakhatah chuan hel tam tak sipai hmunah hian an awm a, mi ruang an rap lai vel pawh a lang niin Reuters chuan a tar lang.
Thawhtannia an chetna ve thungah JNIM hian an fighter-ten sipai tumhmun leh Russian mercenary-te an bei niin an insawi.
Sipai leh venhim hna thawktu dangte chuan ‘an bei let’ tih AFP news agency an hrilh a; mahse, helho hi ‘khawpui chhung hmun tinah’ an awm niin an sawi.
Tual chhung thuneitu chuan beitute hi ‘lirtheia puak thei tam tak phurin’ an thleng a, sipai camp bulah an tipuak niin a sawi.
Timbuktu hi UN World Heritage Site niin kum 2012 khan Islamist helhovin an lo la tawh a, lak let a nih hnuah pawh beih a tawk fo thin.