All England Club-ah Murray-a lim din dawn
All England Club-ah
Murray-a lim din dawn
Vawihnih a champion tawhna Wimbledon khelhna hmun All England Club, London-ah ngei British tennis great Andy Murray-a lim an din dawn a, kum 2027-ah chuan pei hhman an tum.
Paris 2024 Summer Olympics zawh ruala tennis inelna chawlhsan ve ta Briton Murray hian kum 2013 khan a vawikhatna’n Wimbledon title a sualchhuak hlawl a, kha kha kum 1934 champion Fred Perry hnu lama London grand slam tournament-a British mipa champion leh thei hmasaber niin, a hnu lamah Britian mipate’n he title hi an la hawn leh ta lo a, Wimbledon home leh he grand slam tournament huaihawttu ni bawk All England Club chuan chawimawi phuin an ngai a, grass-court grand slam khelhna hmunah ngei hian a lim din an rel tlu ta a ni.
Tum ren rawn chu ni se kuminah pawh lim tihte mai mai chu an din hman lutukin a rinawm a, kum 2027 daih an tinzawn kher chhan hi he championship kum 150 tlin lawmna pakhat atana an duh vang a ni.
All England Club chairperson Debbie Jevans ainslie + ainslie Performance People podcast hnenah amah, Murray ngei chu a lim siam leh din kawngah a inrawlh ve dawn a, a chechhuakah a tang dawn tih a sawi.
Murray hma chiaha Briton zinga Wimbledon men’s singles title la thei hnuhnungber Perry ngei pawh kha Wimbledon-ah hian kum 1984 daih tawh khan a lim dinin an lo chawimawi tawh a; kha mi tum pawh khan a singles title hmasaber a sualchhuah atanga a kum 50-na lawmna chi khat atan kha chawimawina kha tihsak an ni.
Kum 1934-36 chhung khan a zawnin Fred Perry kha Wimbledon-ah a champion a ni.
Perry hnungdawltu Murray hi tunah kum 38 mi ni ve tawhin, kum 2016 khan a vawihnihna atan Wimbledon title a hlawhchhuak leh a; major title dang a lak chu 2012 US Open niin, 2012 London Games leh 2016 Rio de Janeiro Games-ah khan Great Britain tan Olympic gold medal a awrh bawk.
A career-ah Scot hian ATP title khawlkhawm tlingin, prize money atanga a sum hmuh pawh hi US dollar maktaduai 65 a tling thelh a ni.
Mipa tennis-a legend tling thiau leh hminglemah pawh ‘Big Three’ an tih mai – Roger Federer, Rafael Nadal leh Novak Djokovic-te nen an vanglai innang mah se he’ng tennis icon rualkhat hmakhalh hian November 7, 2016 khan Murray hi world number one a ni thei ngat a, thenkhatin ‘Big Four’ tih hming chherchhuaka Scot pachal an rinlut tel pawh hi a mawh vak lo e!
Tunthla tir lam khan The Queen’s Club lam pawhin London khawpuiah Murray hi chawimawi tawhin, pre-Wimbledon grass court event-a vawi nga ngawt a champion tawhna center court chu Andy Murray Arena tiin an thlak a ni.