Aloe Vera sahbawn siam zir

Mizoram Pollution Control Board chuan Aizawl khawpui chhunga College Eco-Club zirlaite leh zirtirtute tan Aloe Vera hmanga sahbawn siam dan inzirtirna ‘Hands on Training’ chu August 9 khan Govt. Hrangbana College-ah a buatsaih.
RIPANS Department of Pharmacy assistant professor Dr PC Lalawmpuii chu resource person niin, Aloe Vera thlai hlutna, ramhmul damdawi pawimawh tak a nih dan bakah Aloe Vera sahbawn hman thatna hrang hrang a sawi a. A kaihhruaiin sahbawn siam dan zirho a ni. Mizoram University leh college 9 atangin eco-club zirlai za chuang leh green teacher 10 chuang an tel a ni.
Training hi sawrkar laipuia Ministry of Environment, Forests and Climate Change bultum, Environment Education Programme hnuaia huaihawt a ni a; a tum ber chu, naupangte hnena environment tana nunphung daih rei leh tlo (sustainable lifestyle) an neih theihna tura pawimawh thiamna (skill) zirtir chhuah bakah environment tichhe thei thil hmanrua kan hman thinte bansana a aiah environment tana pawi lo zawk uar chho deuh deuh tura inzirtir a ni.