Alvarez a chak leh ta

Pathianni zing khan T-Mobile Arena, Las Vegas-ah inhnek ngaihven hlawh taka a awm a, kawnghren inchuhna inhnek lian takah kawnghren pali kawl khawm mek Saul ‘Canelo’ Alvarez chuan a khingpui Edgar Berlanga a hneh a, a kawnghren a humhim.
Super-middleweight huanga kawnghren pali kawl khawm mektu Mexican boxer Alvarez hian amah chotu Puerto Rican boxer Berlanga lakah bul a tan tha hle. Entu mipui 20,000 zet pungkhawm hmaah Alvarez hian a khingpui Berlanga a nawr buai a, round 3-na lekah a hnek tlu nghal. Hnek tlu hma viau mah se Alvarez hian a khingpui a knock-out zo bik lo va, round 12 an inhnek tluan. Round 12 an inhnek tluan hnuin result puan chhunzawm a ni a, champion lai Alvarez-a’n unanimous decision hmanga hnehna changin a kawnghren a humhim.
Endiktu pahnihte chuan Alvarez hi point 118-109 in an chak tir a, endiktu pakhat chuan point 117-110 in Alvarez a chak tir ve thung. Weight then hran pali-a champion thei kum 34 mi Saul ‘Canelo’ Alvarez hian inhnek vawi 66 zet a hmachhawn tawh a, vawi 62 chakin, draw vawi hnih a nei a, tlawm zawkah vawi hnih a tang tawh bawk. Pathianni zinga a hneh tak Edgar Berlanga kha tlawm nei lova kaltluang mek a ni a. Berlanga kha inhnek vawi 23 a hmachhawn tawhah a vawi khat nan a tlawm a, boxer tha ber ang hiala ngaih Alvarez a ngam lo.
Boxer tha bera inngai Alvarez hian WBA, WBC, IBF leh WBO kawnghren a kawl khawm thin a. IBF kawnghren chuhpui tura ruat William Scull aia Edgar Berlanga hmachhawn a thlan zawk vangin IBF belt hlihsak a ni a, kawnghren pathum; WBA, WBC leh WBO belt te a kawl khawm mek a ni.