American hmeichhe sum thawk chhuak tam zingah Selena, Taylor leh Kardashian an lang

American hmeichhe sum thawk chhuak tam zingah Selena, Taylor leh Kardashian an lang
Firbes-in America’s Richest Self-Made Women list a tihchhuah tharah hmeichhe celebrity an lang nual a, chung zingah chuan Selena Gomez, Taylor Swift, Kim Kardashian leh Beyonce te chu a langsar pawl an ni. He list-ah hian ro khawm vang ni lo, mahni kutkawih ngeia insiam lian te tarlan an ni.
Selena Gomez, kum 32, chu Forbes-in hetiang list a siam a lan vawi khatna a ni a, a hausakna hi dollar maktaduai 700 angin an chhut a, a sum hmuna lian ber chu Rare Beauty cosmetic company a ni. He company-ah hian Selena Gomez hian share 51% a nei a, 2024 chhung bik tê-ah pawh dollar maktaduai 370 a thawk chhuak hman niin Forbes chuan an tarlang.
Taylro Swift, kum 35, hi nikum lama Eras Tour hlawhtling zet mai a neih atang khan a hlutna 23%-in a pung a, a hausakna hi dollar tluklehdingawn 1.6 angin an chhut. Forbes chuan Swift sum hmuhna hi concert ticket hralhna leh a music sales chu a lian ber niin an tarlang a, Swift hi company nei a sumdawnna dang khawih tel lova, rimawi chauh hmanga billionaire ni thei hmasa ber a ni bawk. Forbes hian heng celebrity-te hausakna hi May ni 2, 2025 thleng angin an chhut a, hemi hnuah Swift hian a album hmasa paruk master recording neitu nihna a nei let leh tawh bawk a, a hlutna pawh hi a pung leh sawt dawn a ni.
Thawk khat laia Taylor Swift nen boruak neuh neuh lo nei tawh Kim Kardashian, kum 44, hi Forbes chuan Swift aia hausa deuh zawkin an chhut a, Kim-i hlutna hi dollar tluklehdingawn 1.7 angin an chhut. Kim-i sum hmuhna lian ber chu a hmeichhe hnuailam thawmhnaw company Skims a ni. Kim-i laizawn (nu hmun, pa hrang) Kylie Jenner, kum 27, hausakna pawh dollar maktaduai 670 angin an chhut a, ani sum lak luhna lian chu Kylie Cosmetics sumdawnna a ni ve thung.
Beyonce lutna pawh dollar maktaduai 780 angin an chhut a, Celine Dion (dollar maktaduai 570) leh Reese Witherspoon (dollar maktaduai 440) te pawh a langsar zingah an tel.
Media mogul Oprah Winfrey hausakna chu dollar tluklehdingawn 3.1 angin an chhut a, ani hian 2003 khan record siamin, mihang hmeichhe zinga billionaire ni thei hmasa ber a ni.