An kawtkaia mualpho Barcelona!

Inrinni zanah an hnuai chiaha pahnihna luahtu Real Madrid an chak zo lo a, an aia khelh khata khel tam zawk Barcelona-in Pathianni zanah Real laka an hmahruaina sawhnghet hlek turin hun tha nei mah se Nou Camp-ah Leganes hneh loin an tlawm ringawt a, La Liga table-ah a ler la luah zui hram hram mah se an hmahruaina a derthawng tawh khawp mai!
Hansi Flick-a team Barca hi Pathianni zan inkhel danga sikhat faia Getafe hnehtu Atletico Madrid chuan point an rawn nihrual a, goal difference hmangin Catalan team hian Real Madrid lehpela pahnihna luah chho Atletico an hmakhalh hram a; pathumnaa chhuk leh ta rih Real lakah point khatin Barcelona an la chungnung tawk a, an hnuaia Madrid khaw team pahnih intlarthla ai hian game khatin hmahruaitu team hian an khel tam zawk nghe nghe.
Barca muala 1-0 hnehna an sualchhuah manah Leganes-in table-ah 15-na an luah chho a, anni pawh hi hmahruaitu team aiin match khatin an la khel tlem zawk bawk.
Inrinni khan champion lai Real pawh chak zo loin Rayo Vallecano mualah 3-3 draw an hlawhchhuak pha hram a, Pathianni zanah an elpui lian Barcelona chuan result chhe lehzual zawk an tawngbaw zui ve leh ta a ni!
Pathianni zan inkhelah first half minute lina a kal mek laiin defender Sergio Gonzalez chuan Oscar Rodriguez-a corner chhuih atangin mikhual hmahruaina goal a tauhlut a, kha goal khat kha team pahnih thenhrangtu leh Barca tlawmna thlentu a ni zui ta a ni.
Dan pangngai angin, Barcelona lamin hun pumin inkhel an thunun leh ngei a, hun puma shot an neih zat pawh vawi 20 tehreng niin, chu’ng zinga goal teuh ber chu Alex Balde cross atanga captain Raphinha half-volley tuihnai takin goal kham a per nghin lawih kha a ni!
League game an khelh hnuhnung pahnihah Barcelona kha home fans hmaah an tlawm zawn ta a; Champions League lama game an khelh hnuhnung vawirukah vawinga ngawt chak tling mah se La Liga lamah tunhnai thla khat chhung hian an talbuai laklawh rih tlat a, an league match khelh hnuhnung vawirukah vawikhat chiah an la chak a, an hmahruaina pawh a tlahniam char char lo thei lo a, chuti chunga hma an la hruai der der thei hi a mak zawk ngawt mai!
Nou Camp thawmthat chhunga an home Olimpic Lluis Companys stadium-ah pawh Pathianni zana Barca inkhel entu kha singli tling lo hretin mi 39,523-in an pawlte chak lo lai an thlirliam leh ta a ni!
Tun kha Barcelona khelmuala Leganes chak vawikhatna niin, point 18 nen table-ah 15-na an luah chho tih tarlan a ni tawh a; Catalan team tlawmna goal awmchhun tauhluttu Gonzalez kha mikhual captain niin, vengtu nei loin Barca goalkeeper Inaki Pena ven goal-ah duhthalin a tauhlut a; home team lamin an siphurh sut turin hun ngah tawk mah se hun puma shot vawi 20 an neihah tum 16 zet chuan target a thelh a, ball 80% chang chungin Leganes tlarhnung lama player panga ding khawng tlat leh inthununna vawng tha em em kha paltlang an harsat tlat a ni.
Goal zawna ball an thawnluh awmchhun vawiliah pawh Leganes goalkeeper Marko Dmitrovic an paltlang zo lo a, first half-a a save pakhat phei chu a pui hle a ni.
Kum 32-a upa ni tawh Serbian keeper hian minute 10-na lekah veilam sir atanga Raphinha chawm Robert Lewandowski goal tur tha zetin a dansak a; minute 33-ah Raphinha volley kawh zet chu lo dek zeuhin goal kham a fuh phah a; a hnu lawkah Lewandowski nen an inhmachhawn tumin Pole goal tur hi a tihthuanawpsak zui leh ngat bawk!
Mualneitu team goal khung thei lo an talbuai tulh tulh a; an siphurh sut tuma tan an khawhna lamah Dani Olmo, Lamine Yamal leh Raphinha-te’n an hun tha hmuh bawhpelh vekin, Lewandowski leh Jules Kounde-te pawhin an chance hmuh dang an hloh ve leh bawk.
Inkhelh banah Catalan team tana goal khung zo lo Pedri chuan, “Vawiina kan hun tawn nen chuan hlim taka in lam pan a har ve duh khawp mai. Goal hmaah goal khung turin kan arhchhuak zo lo a, kha aia game tha zawk kha kan hmabakah hian khelh chhuah theih ngei kan mamawh a, kan tumpuite lakah khati taka hmaah khan goal kan chhuah mai mai tawh tur a ni lo.
“Goal khung theihna hun remchang pawh kan siamchhuak tam ve tawkin ka hria a, mahse, a tawp khar dan kan thiam tlat lo a, La Liga kawtkaia kan talbuai mek dan hi sawifiah a harsa hle a, chutih rualin kan dinhmun mek hi thawhsan kan mamawh hle a ni,” a ti.