Andy Murray a tla nghal

China Open khelh mekah World No. 1 hlui Andy Murray chu first round paltlang zo lovin a tla nghal. China lamah British player an che chhia a, an player langsar pathum ten first round an paltlang zo lo rual thup. Murray rual hian Stefanos Tsitsipas pawh first round paltlang zo lovin a tla ve bawk.
Veteran player Andy Murray hian tunhnaiah vawi li ngawt a hneh loh zawn tawh Alex de Minaur a hmachhawn a, match point vawi thum ngawt a chhawr tangkai zawh loh vangin tlawm zawkah a tang leh ta nge nge.
Murray hian Minaur lakah bul a tan tha a, break a neih a chhawr tangkai a, awlsawm takin set khatna a la. Set hnihnaah an inhnehtawk zui viau a, game an inlakchhawk zak zak. Murray hian break theihna remchang a nei a, a break thei a nih chuan chak mai tur a nih laiin a tum hnih ngawt break point a hloh a, chak theihna hun tha a neih a bawhpelh zawn. Set a lak zawn theih loh hnuin set thumna tie-break-ah chak theihna hun tha a neih a chhawr tangkai zo lo nawn leh. A hun tha a loh zel hnuin Minaur hian chak theihna hun tha a neih a chhawr tangkai nghal thung a, 6-3 5-7 7-6 (8-6) a chakin, second round a lut ta daih a ni.
China Open khelh mekah British player an tlo lo hlawm viau a, Murray tlak hnu hian Cameron Norrie leh Dan Evans te an tla zui ve leh.
Britain No. 1 Norrie hian Russian fifth seed Andrey Rublev a hmachhawn a, set la hmasa zet mah se tlawm zawkah a tang. Norrie hian set khatnaah break neiin, set a la a. Set hnihnaah game khat bak a la thei lo thung a, Rublev a khan lo ta viau. Set thumnaah insiamtha hret mah se a serve a hum zo lo leh tlat a, Rublev hian 4-6 6-1 6-4 in hnehna an chang ta zawk a ni. Norrie tlak rual hian kum 33 mi Dan Evans chu Jannik Sinner lakah 4-6, 7-6, 3-6 in a tlawm zui ta a ni.
Mipa lama inkhel dangah world No. 3 Daniil Medvedev chuan a khingpui Tommy Paul a hneh hnuin De Minaur a hmachhawn zui leh dawn a. Player ngaihven hlawh dang Holger Rune pawhin second round a lut ve bawk. Hetihlai hian Stefanos Tsitsipas chu Nicolas Jarry lakah a tlawm nghal thung.