Anthurium Festival hmang

Reiek Tourist Resort-ah Anthurium Festival 2023 chu Zirtawpni atang khan hman tan a ni a. Vawiin – October 21 hian a hmun ngaiah hman chhunzawm a ni ang.
A hawngtu Tourism secretary Dr Lalrozama chuan Anthurium Festival chu kan hnam nunphung leh ziarang khawvel hmuha kan phochhuah ve theihna a nih angin, Festival chhimtute chu kan hnam rohlu leh ziarang ngaihhlut lama tan la zual turin a sawm. Tourism chu eizawnna tha tak a ni, tiin, “Khualzinten kan ram mawina leh kan ramngaw chhunga cheng ramsate, kan ram sik leh sa nuam tak chhim tur hian an rawn kal fo tawh thin a. Nasa zawka tourist kan hip zel theihnan mitinin kan ram hi duat taka kan enkawl a ngai a ni,” a ti.
Pachhunga University College Chhawkhlei Cultural Club, Govt. Hrangbana College Zunleng Cultural Club leh Govt. Middle School Reiek ten Mizo hnam lam an entir bakah MHIP Reiek-in traditional parade an entir a. Zaithiam zai ngaihthlak a nih bakah Stunt Show thlirho a ni. Festival pual hian stall hrang hrang siam a ni bawk.
Anthurium Festival hi kum 2006 atang khan kum hnih khat rokhawlna avanga hman loh zeuh bak chu kumtin hman thin a ni.