Ariana Grande ‘Eternal Sunshine’ a êng ber

Ariana Grande album thar ‘Eternal Sunshine’ chu kar khat chhunga US-a album hralh tam ber niin, Billboard 200 (albums) chart No.1-ah a debut a, he chart-a No.1 kai thei album paruk a nei tling ta. A album dang Positions (2020), Thank U, Next (2019), Sweetener (2018), My Everything (2014) leh Yours Truly (2013) te a lo No.1 pui tawh bawk a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralh zat bakah streaming atanga album tlukpui leh album-a hla mal hralhna atanga album tlukpui te belhkhawm thin a ni.
Eternal Sunshine hi kar khat chhungin 2,27,000 an hralh hman a, chung zinga 1,48,000 chu streaming atanga album hralhna tlukpui (on-demand official stream maktaduai 194.92) niin, album tak tak hralh chu 77,000 ani a, album-a hla mal hralhna atangin 2,000 a tling thei bawk.
Morgan Wallen ‘One Thing at a Time’ chu 68,000 hralh lehin No.1 atangin No.2-ah a tawlh a, Noah Kahan ‘Stick Season’ pawh 48,000 hralh lehin No.2 atangin No.3-ah a tawlh a, chart No.1 hlui Ye leh Ty Dolla Sign ‘Vultures 1’ chu 45,000 hralh lehin No.3 atangin No.4-ah a tawlh a, chart No.1 hlui bawk SZA ‘SOS’ chu 45,000 tling lo deuh hralh lehin No.4 atangin No.5-ah a tawlh ta bawk.
Chart top 10-a lang dang zawng pawh No.1 hlui vek niin, Zach Bryan self-titled album chu 41,000 ralh lehin No.8 atangin No.6 a kai thar leh a, Drake ‘For All the Dogs’ chu 39,000 hralh lehin No.5 atangin No.7-ah a tawlh a, Taylor Swift ‘1989 (Taylor’s Version)’ chu 38,500 hralh lehin No.6 atangin No.8-ah a tawlh a, Swift ‘Lovers’ chu 38,500 tling lo deuh hralh lehin No.7 atangin No.9-ah a tawlh a, Morgan Wallen ‘Dangerous: The Double Album’ chu 38,000 hralh lehin No.9 atangin No.10-ah a tawlh ta bawk.