Army ten an sawm vanga Manipur kal inti

Editors Guild of India (EGI) chuan Supreme Court hnenah an team te chuan Army-te sawmna avangin Manipur tlawh mai zawk an nih thu sawiin vernacular media te report dik tawk lo kara ‘objective assessment’ siam theih nana chahluh an ni tiin a sawi.
“Volunteer anga kal kan ni lo. Army te sawmna avanga kal mai kan ni. Army te atangin lehkhathawn kan dawng a ni,” tiin senior advocate Kapil Sibal, EGI tana ding chuan Chief Justice of India D.Y. Chandrachud Bench hnenah a sawi.
Chief Justice chuan eng vangin nge Army te chuan Manipur-ah EGI te chu kal tura an duh a hriatthiam loh thu a sawi a.
“Thil awm dan dik tak hrefiah turin min duh vang a ni. September 2 khan report kan tichhuak a. September 3 zan khan Indian Penal Code hmanga thubuai siamsak kan ni a. Chief Minister in min sawiselna thuchhuak a tichhuak a. Report tihchhuah avangin engvangin nge khin kan nih?” tiin Sibal chuan a sawi.
Chief Justice chuan Solicitor General Tushar Mehta, Manipur sorkar aiawha ding hnenah chuan he case hi EGI tena First Information Report (FIR) an thehluh atanga awm vek a ni, a ti a.
“Report mai a ni a. Sibal-an zawhna a siam ber chu EGI subjective opinion kaihhnawih mai a ni a. A hmuna awm tu ten emaw pawi an khawih pawh a ni lo. Report an tichhuak mai a ni,” tiin Chief Justice chuan a sawi bawk a.
Chief Justice chuan Sibal-an EGI te chu Delhi High Court an pawh remti tura a tih chu ngaihtuah a intiam bawk a, FIR te hnukkir tura Manipur High Court aia Delhi High Court-a zualko a phalsak an beisei a. Court chuan September 15-ah ngaihtuah leh a nih tur thu sawiin September 6-a journalist te man lo tura thupek a lo siam tawh chu a pawtsei bawk.
Hearing neih laiin Chief Justice chuan Mehta chu case chu Delhi High Court-a transfer a remti em tiin zawhna a siam a. “FIR hi hnawl kan tum lo va, Delhi high Court ngaihtuah turin kan ti thei ang em?” tiin Chief Justice Chandrachud chuan a sawi bawk a.
A tirah chuan Mehta chuan Delhi a case transfer chu a hnial zet a, EGI te chuan ‘national, political issue’ a chhuah an tum a ni, a ti a. Eng vangin nge petitioner te chu Manipur-ah ni lo, Delhi-ah an awm mek tiin zawhna a siam a.
Manipur High Court chu tha takin a thawk reng thei a, virtual hearing a nei reng thei a ti bawk a. Chief Minister hming lam pawh politics thila kaihherna ni tiin a sawi bawk.
Mahse hei hi hnialin Sibal chuan Manipur-a a client te kal chu a rem lo a ti ve thung a. A tanna tihchak nan lawyer pahnih Professor Kham Khan Suang Hausing aiawha ding te chenna in chu tun hnaia Manipur-a suasam a nih dan a sawi zui a. “Delhi-a ngaihtuah min phalsak rawh” tiin Sibal chuan a ngen zui a ni.
FIR thehluhah EGI president Seema Mustafa, Sanjay Kapoor, Seema Guha leh Bharat Bhushan te chu Indian Penal Code hrang hrang defamation, sakhaw biakna hmun tihhmelhem, criminal conspiracy etc thubuai siamsakin an awm a ni.
EGI report chu a dik lo tih leh thudik lo sawi tia sawiin EGI report lakah FIR thehluh a ni ta a ni. EGI chuan an report chu fact-finding team tena nasa taka an zin kual hnuah leh a tuartute an interview ngei hnua an siam chauh a nih thu leh August 7 leh 10 chhungin Manipur hmun hrang hrang an fan thu an tarlang a.
EGI report chuan Manipur Chief Minister Biren Singh an September 4 a press conference neiha a sawi hnuah journalist te free speech leh personal liberty te derthawngah a awm tiin a sawi a.
“Chief Minister-in press conference a neihnaah EGI chuan buaina chawkchhuak turin thu na tak tak an sawi a ni” tiin senior advocate Shyam Divan, EGI aiawha ding chuan September 6-a hearing neihnaah a lo sawi tawh bawk a ni.
Manipur buaina chungchang hi Supreme Court ah thubuai thahnem tak theh luh a ni bawk a.
Manipur buaina hian reh lam a la pan hleithei chuang lo va. Boruak tang tak la awm rengin thil pangngai in a la awm hleithei chuang lo bawk. Tlang mite phai lamah an la let thei bawk lo va, chutiang bawkin phai mi te pawhin tlang ram an pan chuang lo. Chutih lai chuan tun hnaia EGI te report chu Manipur sorkar in a la na hle a, Chief Minister Biren Singh pawhin a tei theih lohna pawh langsar takin a pholang zui zel bawk a ni.