Arsenal chak laiin United an tlawm

International break leh FA Cup quarter-final khelh a nih vanga English Premier League chawlh a nih hnuin Thawhleh zan khan EPL khelh chhunzawm leh a ni. Thawhleh zana inkhelah champion tum Arsenal in hnehna an chang a. Arsenal an chak laiin table hnuai lam chhuahsan tum Manchester United an tlawm ve thung.
2024-25 season ah match kua chauh khelh tur nei tawh chunga champion beiseina tlem la nei Arsenal chuan Emirates Stadium-ah Fulham an mikhual. Fulham an hmachhawn tum hian hliam vanga chawl reng Bukayo Saka a kir a, Saka hian goal a thun nghal nghe nghe.
Emirates stadium-a inkhel hmuhnawm takah hian goal a lut mai thei lo. Beisei anga goal lut a awm lawk theih loh hnuin striker pangngai an inhliam vanga striker a chher chawp Mikel Merino chuan minute 37-naah hmahruaina goal a thun. Merino hian mamawh laiin goal a thun thei viau a, midfielder ni bawk mah se Arsenal tan striker pawimawh a ni mek. Merino goal thun hnu hian chawlhlawk hmain goal dang a luh belh thei tawh lova, Gunners in 1-0 a hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal khat an thun belh leh. Hliam vanga chawl reng Bukayo Saka chuan bench atangin mualchhung a lut a, Fulham a hmachhawn. Saka hian mual chhung a luh atanga minute sarih hnu lekah goal a thun nghal. Minute 73-naa Saka goal thun hmangin Arsenal hian si hnih faiin hma an hruai. EPL season kal mekah Saka telna inkhel vawi 16-nah Arsenal in goal 34 lai an thun a. Saka tela an khelh hian match khatah goal 2.1 thun zel ang an ni. Hliam vanga Saka a khelh theih loh chhung khan Arsenal hian inkhel vawi 13 an hmachhawn hman a, heng inkhel vawi 13-ah hian goal 19 chuah an thun thung a. Match khatah goal 1.5 thun zel ang an ni chauh a, hei hian Arsenal tan Saka pawimawhzia a tilang chiang viau awm e.
Mikhual an nihna hmunah si hnih an phurh reng hnuin Fulham tan hian Rodrigo Muniz chuan minute 90’+4-ah goal thunin an si phurh a sut then naa Gunners lakah tlawm an pumpelh thei ta chuang lo. Fulham lakah an chak leh tak vangin Arsenal hian hmahruaitu Liverpool nen an inkar chu point kuain an tizim hret a. Liverpool aiin vawi khatin an khel tam zawk thung.
United an tlawm
Arsenal in an mualah hnehna chang a, champion beiseina an neih zui zel laiin table laihawl hnuai lama chhuahsan hleithei lo Manchester United chu Nottingham Forrest hneh lovin an tlawm ve thung. Forrest laka tlawm United hi 13-naah an awm.
Season kal mekah beisei phak baka khel tha Nottingham Forrest hian City Ground-ah team lian Manchester United an mikhual. An mikhual United lakah hian bul an tan tha viau a, inkhel tan atanga minute ngana lekah Anthony Elanga chuan hmahruaina goal a thun. Elanga-a’n a club hlui United laka goal a thun hmang hian an mualah hnehna pawimawh tak an chang a, EPL-ah pathumna an luah nghet deuh deuh zel.
United hnehtu Nottingham Forrest hian khelh 30 atangin point 57 an hmu a, an hnuai chiaha awm Chelsea aiin khel tam hret mah se point riat zetin an sang zawk mek a, champions league khelh phak an hnaih deuh deuh zel. United hnehtu Nottingham hian FA Cup semi-final an lut tawh bawk a, an khel tha tluang hle. Pathumnaah Nottingham Forrest an insawhngheh laiin Manchester United erawh chu 13-naah an awm ve thung.
Nilai zana inkhel dangah Wolves chuan Jørgen Strand Larsen goal thun hmangin an mikhual West Ham United an hneh ve bawk.