Arsenal fixture a fuh

Thawhtan zan khan FA Cup fourth round khelh zawh a ni a. Fourth round-a inkhel hnuhnung berah Brentford chuan mikhual an nihna hmunah minute 70-naa Sam Heathcote own-goal hmangin Macclesfield FC an hneh hram a, mualpho pumpelhin fifth round an inhlangkai. Brentford leh Macclesfield FC an in khelh zawh hnuin fifth round a intum tur pawh fel zui nghal niin team lian Arsenal fixture a fuh a, League One Mansfield an hmachhawn zui dawn.
FA Cup ah vawi 14 champion tawh a, champion ngun ber ni mek Arsenal hian EPL a elpui leh Championship club an pumpelh rih vangin an vannei a, league one club hi an tan hneh harsa lo tura ngaih an ni. English Premier League (EPL), Carabao Cup leh Champions league-ah cham pion tuma tan khawh mek an nih vangin Gunners hian inkhel hautak tak tak an hmachhawn a ngai a. Inelna hrang hrangah an chet that vangin hah pawh an hah viau. An chauh mai a hlauhthawnawm laiin FA Cup-ah team nem zawk tura ngaih an hmachhawn tur hi an tan chuan thawkhuaina tham a ni dawn a. An player thate awltir chung pawhin an chak theih ngei a rinawm.
Arsenal in fixture awlsam an neih laiin Manchester City erawh chuan St James Park-ah Newcastle United an hmachhawn a ngai dawn thung a, round sang zawk inhlangkai thei turin fiahna hautak an hmachhawn a ngai dawn. Newcastle United leh City te inhmachhawn tur hi FA Cup fifth round a intum zinga ngaihven hlawh ber a nih hial a rinawm.
Team lian zingah EPL table mawngphah a awm mek Wolves in an mualah Liverpool an mikhual dawn. Liverpool tan Wolves hi huphurhawm an nih a rinawm loh. London club lian Chelsea pawhin khingpui hautak an pumpelh rih a,
Wrexham an hmachhawn dawn. FA Cup fifth round a intum tur zingah West Ham eh Brentford te inhmachhawn tur chu inhnehtawk deuh ber tura ngaih an ni a. Leeds United leh Norwich City te an inhnehtawk viau a rinawm bawk.