Arsenal in Chelsea an hneh

Pathianni zana a English Premier League khelhah Arsenal chuan fiahna hautak an paltlang a, point 5 in hma an hruai nawn leh. Arsenal rual hian Manchester United pawhin an mualah hnehna an chang ve bawk. Pathianni zan hian EPL-ah inkhel pali a awm a, team pali ten an mualah 2-1 theuhin hnehna an chang hlawm
Arsenal 2-1 Chelsea
Table-a hmahruai mektu Arsenal hian North London derby-ah Tottenham an hneh hnuin London derby an hmachhawn zui leh zat a, team lian leh tha zawk Chelsea an hmachhawn. Emirates Stadium-a London derby a hmuhnawm viau a, khel tha lo Arsenal in harsa taka hnehna changin point thum hlu tak an hmu. Blues laka point thum an hmuh hmangin Gunners hian point ngain Manchester City an kalsan zui leh nghal.
City nen an inkar tizau thar leh tura chak mamawh Arsenal hian an mualah chak ngei tumin tan an khawh a, bul pawh an tan tha thawkhat viau. Minute 21-naah William Saliba chuan corner atanga ball kal a tauh goal a, minute 21-naah hmahruaina goal a thun. Ball kanga hlauhawm thin Arsenal an hlawhawm chhunzawm zel a, Chelsea lakah pawh ball kang atang bawkin goal an thun.
Hmahruaina goal an thun hnuin Arsenal an khel tha zui lova, an chiai a, an talbuai deuh teh tlat. Corner atanga goal an chhuah teuh viau hnuin chawlhlawk dawn hnaihah an chesual a, goal an chhuah ta nge nge. Reece James corner chhuih tha zet mai chu Piero Hincapié chuan an lamah a tauh goal a, minute 42+2-ah Chelsea si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Arsenal in corner atangin goal an thun nawn leh. Corner atanga ball kal hi defender Jurriën Timber chuan minute 66-naah fuh takin a tauh goal a, hma an hruai nawn lehna goal a thun. An hnufual thar leh hnuin Chelsea in an si phurh sut ngei tumin tan an khawh a, khelh chhe lem lo mah se an chesual tlat thung. Arsenal chuan Chelsea hi an nawr let thut a, Gabriel Martinelli ball khalh tha tak chu Pedro Neto chuan a titlu a, a vawi hnih nan yellow card a hmu a, minute 70-naah hnawhchhuah a ni. Hmahruai zawk leh tam zawk an nih vangin Arsenal in an mualah chak theihna hun tha tak an nei a, goal an thun belh ngei pawh a rinawm hle.
Tlem zawk ni bawk mah se Chelsea an huaisen a, Arsenal an chhaihbuai. Blues hian Arsenal tlarhnung an chhaihbuai fova, goal pawh an thun teuh hle. Bench atanga lut Garnacho chuan goal a thun teuh viau a, si nghak David Raya chuan vanneihthlak takin a lo dang hman hlauh thung. Hun pek belh tawp dawnah Chelsea in goal thun bawk mah se offside vangin an goal thun hi hnawl a ni a, Gunners an him hram. Arsenal tlarhnung te an inrinthulh vangin Delap pawhin hlauhawm a siam bawk. Khel chhia in, derthawng viau mah se Arsenal hian an hmahruaina an humhim hram a, an mualah hnehna pawimawh tak an chang zui ta a ni.
Pathumnaah United
Manager lailawk Michael Carrick hnuaiah Manchester United an khel tha chhunzawm zel a, pathumnaah hial an inhlangkai der tawh. Aston Villa lehpela pathumnaa inhlangkai United hian Old Trafford-a an mikhual Crystal Palace chu 2-1 in an hneh hram a, point thum hlu tak an hmu.
Old Trafford a lenglut Crystal Palace in bul an tan tha viau a, Maxence Lacroix chuan fuh taka tauh goal in minute 4-na lekah hmahruaina goal a thun nghal. Hma takah goal chhuah mah se United in an si phurh an sut mai thei lova, an si phurh sut turin second half an nghah thlen a ngai a. Goal thun turin penalty an mamawh tel bawk.
United hian second half tirteah inhnial theih takin penalty an hlawhchhuah a, penalty chawitu Maxence Lacroix chu hnawhchhuah a ni bawk. He penalty hi Bruno Fernandes chuan awlsam takin a pet goal a, minute 57-naah an si phurh a sut.
Goal khat ve ve a thun hnuin United an khel tha chhunzawm a, tam zawk an ni bawk nen an khingpuite an nawr tawm deuh chawt. United tan hian Bruno Fernandes ball vawrh luh tha tak chu Michael Carrick hnuaia vul thar tak Benjamin Sesko chuan minute 64-naah tawih zetin a tauh goal a, hma an hruai letna goal a thun. Palace hian an si phurh sut tum viau mah se tlem zawk an nih vangin an tan chet a harsa tawh a, team lian Manchester United lakah an tlawm zui ta a ni.