Arsenal leh City inlan zan

Zanin zanlai dar 1:00 ah English Premier League (EPL) khelh chhunzawm a ni leh dawn a, inkhel paruk a awm ang. Champion tuma inum fal mek Arsenal leh Manchester City te an inlan dawn. Arsenal leh City result a zirin champion tuma inelna boruak a nung thar leh zual sauh mai thei.
Table-a hmahruai mektu Arsenal hi 11-naa awm mek Brighton & Hove Albion hmachhawn turin American Express Stadium-ah an lenglut dawn. Mikhual an nihna hmunah hnehna an chang a nih chuan a lo berah pawh point 5 in an sang fal dawn a. Khelh hmabak vawi riat chauh nei tawhin, champion an hnaih leh zual sauh ang. Brighton lakah an chak zo lova, an mualah City an chak bawk si a nih chuan champion tum Arsenal dinhmun a chhe leh zual dawn thung.
Brighton hi 11-naah awm mek mah se team khawng pangngai tak mai an ni a, zuam sual an awl hle. An muala inlan tur an nih bawk vangin Arsenal tan khingpui hautak an tling ngei dawn a, Laipui titlawlh a, an kawng daltu lian ni thei dinhmunah an ding.
Brighton leh Arsenal te hi EPL-ah vawi 17 an inhmachhawn tawh a, Arsenal in vawi sarih hnehna an chan laiin Brighton in vawi nga hnehna an chang ve thung a, an inhnehtawk ang reng hle. Vawi hniha Arsenal an chak tam hret laiin vawi nga dang an inhnehtawk ve tawh thung. An intum hnuhnung vawi ngaah Gunners in vawi thum hnehna an chang a, vawi hnih dang an inhnehtawk ve thung. Tunhnaia an hneh hleih theih loh Arsenal hneh tumin Brighton in an mualah tan an khawh ang.
An chung chiaha awm Arsenal in Mimuala Brighton an hmachhawn dawn laiin Manchester City chuan an mualah Nottingham Forrest an hmachhawn ve dawn thung a. Pep Guardiola team hian an mualah chak theihna hun remchang an nei tura ngaih a ni.
Manchester City hian EPL-a Nottingham Forrest an hmachhawn hnuhnung pangaah vawi li ngawt hnehna an chang a, vawi khat tlawm ve zeuh mah se Forrest hi an ngam hle. 17-naa awm mek lakah an muala inlan tur an nih bawk si vangin City hian point thum an hmuh a beiseiawm hle.
Season liam taah chetha viau mah se season kal mekah Nottingham Forrest in beisei an phak ta lo hle thung. Khelh 28 atangin point 27 an hmu a, tlakhniam hlauhawm takah an awm mek. A him chin chiah chiah 17-naah awm mek mah se an hnuai chiaha awm West Ham United nen point hnih chiahin an inthlau a. Khelh hmabak 10 an la neihah him tumin tan an khawh hle a ngai dawn. Tlakhniam hlau, thih thaa tan khawh an ni tur hi City tan pawh an hlauhawm theihna lai tur a ni ang.
Zanina inkhel tur zingah Newcastle United in Manchester United an mikhual tur chu inkhel ngaihven hlawh zual zingah tel ngei dawn. Manager lai lawk Michael Carrick hnuaiah United an kheltha viau a, khelh 10 chhung zet tlawm nei lovin an kaltluang tawh. United hian St James Park-ah hnehna an chang a nih chuan pathumna an luah zui dawn a. An chak zo lo a nih erawh chuan top 4 huang luah phak lova tlahniam thei an ni ve thung.