Article 370 nuai bo SC-ah ngaihtuah zuiin awm
Chief Justice of India D.Y. Chandrachud chuan constitutional democracy a nih angin India chuan public opinion chu established institution heng Parliament ang atang te hian lak tumin Brexit-type referendum angin a kalpui ve lo tiin a sawi.
Article 370 Jammu and Kashmir hnena special status pekna nuaibo khinna ngaihtuahtu Constitution Bench enkawltu Chief Justice chuan he thu hi petitioner aiawha ding senior advocate Kapil Sibal a chhanna a ni a.
Sibal chuan Parliament leh Union government chuan Article 370 chu sir khat chauh enin an nuai bo a, Jammu and Kashmir mipuite duh dan hriatthiam pawh tum miah lovin chet an la a ni tiin a sawi a.
“Jammu and Kashmir nena special relationship awm nuai bo i duh takzet chuan mipuite ngaihdan i la hmasa tur a ni a. Thutlukna siam hmain mipuite ngaihdan chuan a lailum a luah tur a ni. Politics thila thutlukna siam a ni tur a ni a. Brezit ah eng nge thleng? Referendum neih turin constitutional referendum a awm lo. Tichung chuan mipui ngaihdan an la la tho a ni,” tiin Sibal chuan a sawi.
Mahse Chief Justice Chandrachud chuan Brexit dinhmun chu India ram angah hman theih a ni lo tiin a chhang thung a.
“Constitutional democracy-ah chuan mipuite ngaihdan chu established institution te hmanga lak a ni. Mipui ngaihdan thlak danglamna chu established institution te hmangin a ni tur a ni a. Brexit-type referendum anga kalpui tur a tih ngawt theih loh. Kan constitution ang hnuaiah hi chuan referendum a leng ve lo,” tiin Chief Justice Chandrachud chuan a chhang a ni.
Sibal chuan Union government chuan Article 370 chu ‘executive acts’ thahnem tak hmangin a nuai bo tia sawiin a hmasa berah Jammu and Kashmir Legislative Assembly leh State sorkar a thiat phawt a, chumi hnuah President’s rule puang lehin Article 370(3) provision khawih danglam lehin hei hi Jammu and Kashmir Constituent Assembly dan tumna niin chungte chu Article 370 hmantlak loha a siam hmaa a tih vek a ni tiin a sawi a. “India sorkar hian Constitution a bum a ni,” tiin a sawi bawk.
Sibal chuan Union government leh State of Jammu and Kashmir inlaichinna chu ‘federal hliah hliah’ tia sawiin Stae dangte nena quasi-federal a ni ve lo. Hei vang hian State leh mipuite ngaihdan lak chu tihmakmawh a ni tiin a sawi bawk.