ASF hrileng reh hlei thei lo

On Aug 30, 2023 10 0

A nasa lo na a, mahse ASF hrileng a reh hlei thei lo.
Vawk thi a la awm reng a, hri awmna hriat belh a ni bawk.
Tunlaiin African Swine Fever (ASF) hri a leng mek a, vawk 500 chuang a thi tawh. Khawzawl district-ah finfiah leh a ni bawk.
AH&Vety department-in an chhinchhiah danin, August ni 28 thleng khan Mizoramah ASF vangin vawk 574 a thi tawh a, vawk 309 tihhlum/suat a ni tawh bawk.
July ni 28 thlenga vawk thi zat kha 242 a thi a, thla khat chhungin vawk 332 a thih belh tihna a ni. Hrileng mek hi May thlaa intan a ni a, May, June leh July thlatea thi aiin August thlaa thi zat a tam zawk tihna a ni.
AH&Vety department lam chuan hri hi a hluar hluai tihnaah an ngai lo a, Khawzawl district-ah hriat thar a nih vang a ni tih an sawi. Hrilen hmasakna hmunah chuan a zia a, a reh tawhna pawh a awm. Hri an hmuhna hmasa Champhai district-ah chuan a reh tawh a, Aizawl khawpuiah a reh tawh bawk.
Tun hrileng hi May thlaa intan a ni a, finfiah hmasak ber chu May ni 6-a mi a ni. Champhai, Kolasib, Aizawl, Mamit leh Lunglei district-ahte finfiah a nih hnuah Khawzawl district-ah a leng leh a ni.
2021-ah khan ASF hi Mizoramah hmuh a ni a, kum tir lam atangin 2022 February thlengin he hri hi Mizoramah a leng. 2022-ah hian a thawh hnihna a leng leh a, December ni 22-ah a tawp tiin an chhinchhiah. Tuna leng mek hi a thawh thumna a ni.