Asian Games football-ah India tla

A team neih khawng ber pawh hruai se an ngaihtuahawm dawn laiin India head coach Igor Stimac chuan Indian Super League organiser-te’n India player an kawl lai an chhuah that duh loh avangin Hangzhou khuaa Asian Games men’s football competition-ah team nem zawk a chhuahpui a, engtin tin emaw round of 16 lut ve hram mah se Ningani pre-quarterfinal match-ah team khawng Saudi Arabia hneh loin Blue Tigers an tla fel.
Indian football team lakah Arab team hian an theihna tak tak (‘A’ game) chhuah loin lang mah se sihnih faia India hneh turin an tha tawk tih an lantir a; first half tir lam minute sarih chhunga forward Mohammed Khalil Marran goal hnih tihluh hmangin Saudi Arabia-in team chungnung zawk an nihna an lantir.
Sunil Chhetri hoa inlan India team hian Asia team tha lakah hnehna chang zo lo mah se boss Stimac-a fak an hlawh a, ISL lamin an player-te an chhuah that duh loh avangina AIFF-in team nem zawk (second string side) a tir chungin khelmuala tawnhriat nei tlem zawk India player-te inlan dan chuan Croatian coach mit a tlung viau tho a ni.
Saudi Arabia lakah India kha chak ta se thilmak a tling hial zawk dawn a, a chhan pawh international kawtkaia tawnhriat nei tam lo tak tak fawm-khawm an nih piahlamah Asian Games atana India team inbuatsaihna hi a rei loin, a tha tawk lo a, national camp-ah pawh awmtlang ik lo player rualin khawmualpui huap tournament lian an khel thut a, khati chunga first half chhung an lama goal lut tur an dang tluan thei kha manager tan chuan a naute fak loh theih a ni lo ang!
Inkhelh banah captain Chhetri pawhin an dinhmun sawiin, “Ram tana khelh hi chu englai pawhin chawimawina hi a ni ve hrim hrim mai. Kan theihtawp chhuah bawk mah ila tunhma lama khelho ngai lo kan ni a, kan naute tan tawnhriat tha tak a ni dawn,” a ti.
Tlarhnung lamah tawnhriat nei tawh Sandesh Jhingan an hruai thei hlauh a, ani phei khan ho lo ta se thahrui ngah zawk, ke nei khawng zawk leh thiamna sang zawk kawltu Saudi-ho khan an thun mawlh mawlhin a rinawm!
Tournament thlengtu China-in an sawp tum ang bawk khan minute 50 hnu lamah India an zuih leh a, team chhe zawk leh chak lo zawk an nihna a lang a, mahse, Gulf team laka sihnih chiah an chhuah kha inchhuanna tham a tling awm e!