Asian World Cup qualifiers thlirna
Thawhlehni khan Asia khawmualpui atanga kum 2026 World Cup khelh tuma intihsiakna (qualifiers) kal mekah Asian giants Australia an talbuai chhunzawm zel a, mualneitu Indonesia nen goal awm loa inhnehtawkin, karliamta khan qualifiers bul an tanna inkhelah sikhat faiin an mikhual Bahrain lakah an lo tlawm tawh bawk a ni!
Indonesia khawpui Jakarta-a Gelora Bung Karno Main Stadium-ah AFC World Cup Qualifiers Group C match khelin Australia leh Indonesia an intum a, team pahnih inlenhleih dan enin mikhual team kha nuamsaa chak thei tura ngaih an ni a, mahse, Arab team laka an kawtkaia tlawm tawh Graham Arnold-a team-in point hnih an hloh then leh a ni.
Socceroos tan hian rawlthar forward Nestory Irankunda chuan minute 33-ah goal ban a petper a, kha kha mikhual chance tha a ni.
Australia nena group khata awmho Japan thung chuan inkhel dangah 5-0 tehrengin away-ah lehnghal Bahrain an sawp a; he game-ahhian Premier League trio Wataru Endo (Liverpool), Kaoru Mitoma (Brighton) leh Daichi Kamada (Crystal Palace)-te’n Japan tan bul an tan.
South Korea pawhin World Cup 2026 qualifying kal mekah a vawikhatna atan hnehna an sualchhuak ve ta nge nge a, Tottenham captain Son Heung-min leh Wolves forward Hwang Hee-chan-te goal hmangin Oman lakah 3-1 hnehna an chang.
Muscat khawpuia Group B inkhelah hian Hee-chan chuan South Korea hmahruaina goal khung mah se Jung Seung-hyun own goal hmangin mualneitu team-in an siphurh an sut a, Son chuan South Korea goal hnihna khungin, hun pekbelh tawp dawnah Joo Min-kyu chuan chiang zawka khawchhak team chakna goal a tilut ve leh a, Palestine laka goal awm lo draw an hlawhchhuah tawh avangin head coach Hong Myung-bo lakah pressure a awm hman a, Arab ramah hnehna an lawm leh thei ta a ni.
Koreans chak zan hian Kuala Lumpur-ah Palestine an tlawm a, Kuwait nena an bultanna inkhela inhnehtawk tawh Jordan chuan indonain a tihbuai mek Palestine hi 3-1-in an hneh a, Jordan goal hnih hi Yazan Al-Naimat thun a ni.
Group C match pakhatah Saudi Arabia chuan minute 14-na leka Ali Lajami own goal atanga thochhuak lehin Dalian khawpuiah mualneitu China an hneh.
Jiang Shenglong a pet avangin Mohammed Kanno hnawhchhuah a ni a, Roberto Mancini team Saudi Arabia chu player pakhatin an tlem zawk a, heti chung hian halftime dawnah Hassan Kadish chuan Nasser Al-Dawsari corner pet atangin Arab team siphurh a sut a, minute 90-na a kal mek laiin Kadish bawkin Arab team chakna goal a khung zui leh.
Japan chuan Riffa khuaah 5-0 ngawta mualneitu Bahrain sawpin khelh hniha point ruk an ruh tawh hmangin Group C hma an hruai chhunzawm.
Hajime Moriyasu team tan hian Ayase Ueda leh Hidemasa Morita-te’n goal hnih ve ve thunin, Koki Ogawa chuan goal khat a thawh ve bawk.
Asian champion Qatar chu Australia ang bawkin an chak zo lo a, Group A lamah North Korea nen 2-2-a inhnehtawkin, North Korea hian Jang Kuk Chol red card avangin a tlem zawkna nihna hun rei tak chang mah se Vientiane-ah Qataris an chhaihbuai hle a, player 10-in khel mah se second half tir lam minute 50-ah Kang Kuk Chol-a free kick goal hmangin an siphurh an sut a, Asian giants an inehnhawkpui thei!
Uzbekistan chuan Group A hma an hruaina kawngah minute 72-a Oston Urunov goal hmangin Bishkek khawpuiah 3-2-in Kyrgyzstan an hneh a, Srecko Katanec-a team hian khelh hnihah hnehna an chang ve ve.
Uzbeks ang bawka point ruk thawkchhuak Iran chuan Al Ain khawpuiah first-half injury time-a Mehdi Ghayedi goal hmangin Paulo Bento team United Arab Emirates lakah 1-0 hnehna an chang.
Minute sarihna leka an player Rebin Sulaka hnawhchhuah a ni chungin Iraq chuan Kuwait lakah 0-0 draw hlawhchhuakin point li an nei ve tawh.
FIFA World Cup 2026
AFC qualifiers third round points table:
GROUP A
Pos. Team P W D L Pts. GF GA GD
1 UAE 1 1 0 0 3 3 1 2
2 Iran 1 1 0 0 3 1 0 1
3 Uzbekistan 1 1 0 0 3 1 0 1
4 North Korea 1 0 0 1 0 0 1 -1
5 Kyrgyztan 1 0 0 1 0 0 1
6 Qatar 1 0 0 1 0 1 3
GROUP B
Pos. Team P W D L Pts. GF GA GD
1 Iraq 1 1 0 0 3 1 0 1
2 Jordan 1 0 1 0 1 1 1 0
3 Kuwait 1 0 1 0 1 1 1 0
4 South Korea 1 0 1 0 1 0 0 0
5 Palestine 1 0 1 0 1 0 0 0
6 Oman 1 0 0 1 0 0 1 -1
GROUP C
Pos. Team P W D L Pts. GF GA GD
1 Japan 1 1 0 0 3 7 0 7
2 Bahrain 1 1 0 0 3 1 0 1
3 Saudi Arabia 1 0 1 0 1 1 1 0
4 Indonesia 1 0 1 0 1 1 1 0
5 Australia 1 0 0 1 0 0 1 -1
6 China 1 0 0 1 0 0 7 -7