Aspirational Block-a hmalak dan tur rel

Sawrkar laipui atangin Mizorama district pathum atangin RD Block pakhat theuh, Aizawl district atangin Reiek RD Block, Saitual district-ah Ngopa RD Block leh Lunglei district-ah Lungsen RD Block chu ‘Aspirational Block’ atan an thlang a. Lungsen RD Block-a hmalak dan tur relin Ningani khan Lunglei bawrhsap Ramdinliani kaihhruaiin District Level Consultative Committee on Aspirational Block an thukhawm.
Lungsen BDO office-in a buatsaih Draft Block Development Strategy for Lungsen RD Block, Lunglei District chu zirho a ni a. He draft hi sawrkar laipuiin inkaihhruaina a siam zulzuia duan a ni. Lungsen RD Block hmasawnna tura hmalak dan tur chu thu hlawm 5 hnuaia sector 9-ah SWOT (Strengths, Weaknesses, Opportunities & Threats) analysis hmanga duan a ni.
Sawrkar laipui hian Mamit district chu Mizoram district dangte aia dawmkan ngai leh ngaihven ngai zawk ‘Aspirational District’ ah a lo thlang tawh a, tun tumah hian sawrzimin block level-ah a thlang leh a ni.