Assam-ah mipa aiin hmeichhe voter tam zawk, candidate 12 chauh awm thung

Assam-ah mipa iin hmeichhe voters an tam zawk chungin kum 2024 Lok Sabha inthlanah hmeichhe candidate 12 chauh an awm thung a, inthlan hnuhnung zawkah kha chuan 14 an awm a ni.
Heng hmeichhia 12 te hian Lok Sabha constituency 14 awmah pasarihah an incandidate a ni.
Assam hian voters 2,45,72,144 neiin chung zingah hmeichhe voters te chu 1,23,39,241 niin mipa voters 1,23,25,293 an awm thung a ni. Hmeichhe candidate tlem zel zawk hi kum 2014 inthlan atang khan intan tawhin kha mi tum khan hmeichhe candidate 16 an awm thung.
Rorel lai BJP te chuan hmeichhe candidate pakhat chauh neiin Bijuli Medhi chu Guwahati seat-ah an dah a, opposition Congress te chuan Miram Borthakur Goswami chu Guwahati ah leh Roselina Tirkey chu Kaziranga-ah an dintir thung.
Party tenau zingah Gana Suraksha party te chuan hmeichhe canddiate pahnih an nei a, Hindu Samaj Party, Gana Sangram Parishad, SUCI(C) leh Voters Party te chuan pakhat theuh neiin independent candidate pathum an awm bawk a ni.
Kaziranga bikah hmeichhe candidate pathum an awm a, guwahati-ah pahnih leh Kokrajar (ST) ah pawh pahnih leh Sonitpur, Darrang-udalguri, Nagaon, Barpeta leh Dhubri ah te pakhat theuh an awm a ni.
Inthlan thawhkhatnaah khan hmeichhe candidate pali an awm a, thawh hnihnaah pahnih leh thawh thumna leh final phase ni bawkah paruk an awm a, May 7 hian inthlanna neih a ni ang.
Lok Sabha-ah State aiawh hmeichhe candidate a neih tawh chu 18 chauh la niin chu pawh kum 2014 atanga 2019 chhung khan pahnih chauh neiin a tlahniam a ni.
Mahse inthlananah hmeichhe voters te an inhnamhnawih nasa tawh zawk thung a, April 19 leh 26 a Lok Sabha inthlanna neihah khan hmeichhe vote tla 79.9% lai a tling a ni.
Inthlan thawhkhatnaah khan hmeichhe vote tla chu 78.81% niin mipa vote tla chu 77.69% a ni thung a. Thawh hnihnaah hmeichhe vote tla 85.55% a nih laiin mipa vote tla 84.41% a ni thung.
Congress candidate Mira Borthakur Goswami chuan BJP te chuan Women Reservation Bill Parliament-ah an passed chungin north East-ah hmeichhia seatkhat chauh an pe phal a ti a.
“BJP te hian hmeichhiate hi an vote bank atan bak an duh lo va, BJP an vote loh chuan an tuar ang tiin an vaukhan a, scheme hrang hrang atangin an hming paih a ni ang tiin an vau a ni,” tiin a sawi.
Goswami chuan thutlukna siamna kawngah hmeichhiate chu tam zawka an inrawlh theih nan leh hmeichhia te economic leh security chu ngaih pawimawhah a neih tur thu a sawi. Goswami hi BJP candidate hmeichhia ve tho Bijuli Kalita Ms. Medhi nen Guwahati seat inchuhin an inkhing dawn a ni.
Medhi thung chuan tun hnai kum sawm chhunga hmeichhiate tana BJP sorkar hmalakna ang chu eng sorkar mahin an la kalpui lo ti ve thungin orunodoi scheme hmangin hmeichhia te hnenah thlatin Rs 1,250 pek te leh entrepreneurship lama inhmang tan ‘Lakhpati Baideos’ (Lakhpati Elder Sisters) siam a ni tia sawi ve thungin BJP te chu hmeichhe tana hma la a ti.