Assam Rifles chhuahsan huna ram hman dan turah mipui rawn a tha – Chief minister

Assam Rifles-in Aizawla an awmna ram an chhuahsan hunah a hman zui dan tur chu zau zawka mipui nena inrawn thaa a hriat thu chief minister Lalduhoma chuan a sawi.
Aizawl khawpui felfai, khawsak nuam leh ruahmanna tha zawk neih tuma Urban Development & Poverty Alleviation department inbuatsaih tum dan – Aizawl Hmathlir chu Ningani khan inhrilhfiah a ni a. Minister, Aizawl khawpui huamchhunga MLA, AMC atangin mayor leh corporator dangte an tel.
Chief minister chuan urbanization chu khawvel kalphung pakhat a ni, tiin, World Bank chhut danin kum 2050 ah chuan mihring hmun thuma thena hmun hnih hi khawpuiah kan cheng tawh dawn tih a sawi. Aizawl pawh a thang chak em em a, hmathlir fel tak neia inbuatsaih a ngai hle a. Chumi atana UD&PA inbuatsaihna fakawm a tih thu a sawi a ni.
Aizawlin bawlhhlawh paihna mumal leh mamawh phuhru zo tak a mamawh dan, thlanmual intawm a mamawhna, kea kalna tur tam zawk, motor parking hmun tam zawk, bazar zau leh tha tak a mamawh dan a sawi a. Sawrkar laipuiin Aizawl chhuah lam leh tlak lam bypass road thawhna tur a sanction chu a hlawhtlin hunah Aizawl khawpuia lirthei tawt lutuk a ziaawm hlea a rinawm thu a sawi bawk.
Assam Rifles ram chhuahsan hman dan tur chu zau zawka mipui nena inrawn thaa a hriat thu leh ICCC (Integrated Command and Control Centre) hmalakna chu Aizawl enkawlna hmanraw pawimawh tak a ni tih a sawi a ni.
UD&PA minister K Sapdanga chuan Aizawl Hmathlir chu UD & PA hnathawh tawh, thawh mek leh hmachhawp awmte inhrilhhriatna a ni, tiin, UD&PA minister hmasa Pu Tawnluia hmalakna fakin a chungah lawmthu a sawi a. A hmalakna tha tak tak chu an chhunzawm zel dawn tih a sawi.
Aizawl Hmathlir inhrilhfiahna:
8 Aizawl Smart City CEO CC Lalchuangkima chuan thupui pahnih – “Aizawl- Khawpui fai” tih leh “Integrated Command & Control Centre (ICCC) hman tangkai dan tur” a sawi.
8 UD&PA director Dr Andrew H Vanlaldika’n thupui pahnih – Aizawl khawchhunga veivahna tha zawk ruahmanna (Sustainable Urban Transport Project) – ropeway /cable car, city bus service changtlung zawk, corridor & junction improvement, skywalks, regional truck, bus & maxi cab terminals, vertical mobility, multi level off street parking. Assam Rifles insawn huna ram hman dan tur an ruahmanna a lem nena entirin a sawifiah. Aizawl Sustanable Urban Transports Project bik hi Asian Development Bank funding hmanga thawh tur a ni.
8 Khawpui fai nei tura hmalaknaah Solid Waste Management Centre Luangmuala sak tum thu, Solid Waste Management Centre Tuirial hmalakna, Common Biomedical Waste Treatment Facility Tuiriala sak thar kumin July-a hawn, Hualngohmuna Construction & Demolition Waste Centre sak mek leh leivung paihna tur ruahman a nih dan.
8 ICCC hi Smart City hnuaia Aizawl khawpui chhunga mipui leh lirthei chevel vilna lama hmalakna a ni a. Hmun 76-ah CCTV dah a ni tawh. Hmun 14-ah automatic number plate recognition system an dah tawh a, hmun 15-ah free public wifi, hmun 4-ah environmental sensors, hmun 4-ah variable messaging display, hmun 5-ah facial recognition system an bun tawh. Garbage truck 160-ah GPS tracking devise vuah a ni tawh bawk.