Ather Pro Volleyball League tan dawn

Ather Pro Volleyball League tan dawn
Naktuk, April ni 23, Thawhlehni zan hian LPS Arena, Falkland-ah Ather Pro Volleyball League an khel tan dawn a, a hawn nan nikum final-a intum Thutak Nunpuitu Team leh Hunthar an inhmachhawn dawn a, hmeichhe lamah Diakkawn leh Serkawn an inkhel hmasa ber ve thung ang.
Inrinnia Hawla Indoor Stadium Conference Hall, Republic Vengthlanga tournament khuhhawnnaah Central YMA assistant secretary Fabian Lalfakawma’n fixture leh handbook a tlangzarh.
Thawhlehni zanah LPS Arena, Falkland-ah khel tanin champion lai TNT leh champion hnem ber Hunthar an intawng nghal dawn a, Pro Volleyball huaihawt tawhah anni team pahnih chiah hi tel kim vek thei an la ni.
Nikum final-ah Huntharin a vawithumna’n champion thei turin set hnih set khatin hma hruai hman. TNT-in beiletin 25-17, 20-25, 20-25, 27-25, 15-10-in an chak a, a tumkhatna’n an champion rualin mipa team zinga Mizo hlanga champion thei hmasa ber an ni nghal bawk.
TNT hian Mizo hlangin an khel leh dawn a, an manager Vanlalmuanpuia chuan, “Damlohnain Vanlaltanchhana leh player dang a tihbuai avangin kan duh angin karhnih vel bak kim takin kan inbuatsaih hman lo a, a huphurhawm rualin a phurawm hle a ni,” a ti.
Inpuahchahna an neih that avangin Hunthar an inringtawk viau thung a, season liamtaa uiawm taka an tlawmna chhanglet nghal turin hun tha an nei dawn a ni.
Kar leh Nilaini zanah hmeichhe league inkhel tan a ni ve thung dawn a, kaithar ve ve Diakkawn leh Serkawnin an la tawn ngai loh inkhel an hmachhawn ve ve ang.
Aizawl pawn team pahnih tan fiahna a ni tel dawn bawk a; chutih rualin Diakkawnin 2019 Pro Volleyball best player Lalmuanpuii an kawl a, Serkawn hi 2022-a spiker tha ber Elisian Meda-i hoin an khel ve thung dawn a ni.
Tournament buaipuitu lawk pakhat Fabian-a chuan fixture leh handbook a tlangzarh hnuah volleyball chu game ropui leh hmuhnawm a nih thu leh san a pawimawh rualin Mizote’n thiamna tha tak an neih chuan sang tak an thleng thei niin a sawi.
“Hruaitute’n volleyball hi an chawinun zel chuan hmabak eng tak a awm a, Mizoramah infiammi leh insawizawi thin mihring kan tam telh telh chuan ram leh hnam humhalh kawnga YMA hmalakna a hlawhtling hle dawn a ni,” Fabian-a chuan a ti.
Mizoram volleyball inelna sang berah mipa team paruk telin, April ni 25, Ningani zanah 2022 champion Durtlang North leh kai thar Hlimen; April ni 27, Inrinni zanah Tuichangral leh 2019 champion Chhinga Veng Spiker inkhelin, league round hmasa ber zawh a ni ang.
Hmeichhe lamah team panga awmin, April ni 26, Zirtawpni zanah champion lai Luangmual leh Bungkawn an inkhel ang a; April ni 29, Thawhtanni zanah a vawikhatna’n league-ah 2019 champion Durtlang inlan ve thungin, Serkawn nen an intawng dawn a ni.