ATL kawng cheithat mek enfiah

PWD minister Vanlalhlana chuan Aizawl -Thenzawl- Lunglei (ATL) kawngpui siam leh cheithat hnathawh mek chu Thawhtanni khan a hmunah a enfiah a. Lunglei High Powered Committee vice chairman V Malsawmtluanga leh Lunglei West bialtu MLA Lalhlimpuia ten an tawiawm.
Minister chuan thawktute uluk taka kawng siam hna thawk turin a hrilh a. An kawng siam quality a tha tawk em tih chu thuneituten an vil reng dawn tih hrilhin kawng tha leh tlo, hun rei tak daih thei tura tha siam turin contractor-te a hrilh.
ATL kawngpui siam leh cheithat hna hi SASCI-II sum hmanga thawh a ni a. PWD hnuaiah Hmuifang Division leh Lunglei Division ten an vil. Hmuifang Division chanpual lamah defect liability period-in a la huam chin km. 71-83 a thui kawngpui thawmthat hna thawh a ni a; SASCI-II sum vaibelchhe 13.22 hmangin ATL road chainage km. 83-100 a thui kawngpui cheithat hna thawh a ni bawk.
Lunglei Division chanpual lamah SASCI-II hnuaiah kawngpui cheithat hna hi hlawm hniha then niin, contractor pahnihin an thawk a. Hlawm khatna hi chainage km. 120-130 niin cheng vaibelchhe 6.58 hmanga siam a ni a. Hlawm hnihna hi chainage km. 100-120 a thui a ni a, cheng vaibelchhe 6.47 senga siam a ni.