ATL Road siamna tur sum pawhpen dahlet phutin Lunglei kawng dan tum

‘World Bank Road’ tia hriat Aizawl -Thenzawl- Lunglei (ATL) Road atana sum dah, Aizawl khawpui kawng siamna atana pawhpen chu dah let leh phutin Lunglei MZP chuan he kawngpui hi vawiin – April 28 zing dar 7.00 atang hian tiamchin awm loin dan an tum. MZP Headquarters Lunglei chuan ATL Road atana sum awmsa, hmun dang siamna atana Mizoram PWD-in a pawh pen chu an duh lo tih an lo sawi tawh a. Ni 15 chhunga dah let tura phutna an siam tawh a ni. Hun tiam chhung hian sawrkarin an beisei ang tih a neih loh avangin an thil phut tihhlawhtlinna atan ATL Road hi tiamchin awm loa dan an tum thu an lo sawi tawh a ni.
Lunglei MZP hmalak tum dan hi pawl hrang hrangin an thlawp thu an sawi a. ZPM Southern Hqrs. Lunglei leh Lunglei – Aizawl Maxi Cab Welfare pawhin an thlawp.
ZPM Southern Hqrs. Lunglei extended office bearers thuchhuak chuan, ATL Road chungchangah chhim lam mipui rilru natna awm tihpuiin a thlawp a. ATL road siamthat hna a rang thei ang ber leh lang theia hna tan nghal turin sawrkar a phut tih a sawi.
Budget pawnlam atanga hun hmasa lama ATL Road kaihhnawiha sum hmuhlet chu chief minister-in he kawng siamna atana hman a lo remtihsak tawh ang ngeiin, chhim mipui beisei angin ATL Road siamna tur ruahman sak lehnghal turin an ngen tih sawiin, ‘Chhimlam mipui duh dan hi tihlawhtling turin sawkar kan ngenin kan phut a. Tun dinhmunah ZPM Southern Hqrs office Lunglei hawn pawh hrehawm kan ti hle. Mipui rilru damna tur thutlukna min siamsak kan duh takzet a, ZPM Southern Hqrs. Lunglei chuan 2025 April 28-ah office work engmah khawih loh nise,’ a ti.
Lunglei – Aizawl Maxi Cab Welfare bakah MSU Regional Hqrs. Lunglei, Lunglei Thalai Pawl, Hnahthial Thalai Pawl, Lunglei – Tlabung inkara maxi cab service, Joint NGO Chawngte chuan MZP Hqrs. Lunglei hmalakna hi an thlawp tih an sawi a ni.
World Bank hunlaia siam ATL Road hi a siamtu contractor Bhagheeratha Engineering Ltd chuan inremna anga a enkawl zui duh loh avangom Mizoram sawrkarin court-ah a khing a, khing hnehin security deposit an dah bakah a pung (interest) engemawzat lo awm hman tawh cheng vaibelchhe 90.69 hmuh let a ni. He sum atang hian Mizoram sawrkar chuan ATL Road – Kanghmun South leh Lunglei thawmthatna atan cheng vaibelchhe 45.89 a ruahman phawt a, a bak hi hmun dang kawng thawmthatna atan dahin Aizawl khawpui chhung kawng siamna atan pawh dah a ni tih PWD minister Vanlalhlana chuan a lo sawi tawh a ni.
Hetianga ATL Road avanga sum hmuh, hmundanga pawhpen a ni chu hrethiam loin Lunglei MZP hian dahlet phutin lungawiloh an lo lantir tawh a. Mizoram Legislative Assembly Estimate Committee chuan ATL road siamna atan cheng vbch. 90.69 hi dah turin a lo recommend tawh, tiin, sawrkar chu ni 15 chhunga sum hi dahlet turin an ngen zui. An phut anga sawrkarin hma a lak loh avangin April 28 atangin ATL Road dan an tum thu an sawi ta a ni.
The Aizawl Post thudawn danin, April 27 tlai lam thleng khan sawrkar atangin thu lawmawm dawn a la awm lo a. Kawngpui hi dan a nih chuan Lunglei bakah Lawngtlai leh Siaha district lam pawh engemawchen nghawng tel tura ngaih a ni.