Aug.17 zing dar 6 atangin darkar 24 chhung hospital khar vek dawn

August 17 zing dar 6.00 atanga intanin darkar 24 chhung India ram puma medical service zawng zawng tihtawp a ni dawn a, emergency bik erawh a ngai anga kalpui a ni ang.
August 9 khan RG Kar Medical College & Hospital, Kolkata-a post graduate zirlai hmeichhia chu pawngsuala thah a ni a. India ram puma medical community chuan na takin an dem a. Indian Medical Association (IMA) Gen. Hqrs chuan August 17 zing dar 6.00 atanga August 18 zing dar 6.00 AM (darkar 24) chhung India ram huapin medical service zawng zawng (emergency tiam loh) titawpa lungawilohna lantir nise, a ti.
IMA Mizoram State Branch pawhin IMA Hqrs hmalakna hi thlawpin, hemi hun chhung hian Mizorama hospital (sawrkar, private leh mission hospital) zawng zawngah emergency service chauh hawn nise, a ti a. OPD-ah doctor tumah an thu dawn lo tih an hriattir. Hei hian private clinic pawh a huam vek dawn a ni.
‘Tihdam rawngbawlnaa thawktute chunga hleilenna thleng fo mai hi kan duh loa, a thlen tawh loh na’n mi zawng zawngin tan min lakpui turin kan ngen a ni,’ IMA Mizoram State Branch chuan a ti.
He thil thleng duh lohna lantir leh vanduaina tawk ta sunna atan nizan khan Zoram Medical College pawhin an college-ah ‘candle light vigil’ an nei a ni.