August thla kaltaah ruahtui tla tlem

August thla kha kum zabi khat chuang chhunga India-in ruahtui a dawn tlem ber niin a pangngaia a dawn thin aiin 36% in a dawng tlem a. Furpui thla li chhung tia sawiah August thla chu ruahsur nasat ber thla ni thina ngaih a ni.
El Nino a chak zel a, Arabian Sea leh Bay of Bengal a duthusam thleng lo nen August thla khan India ram hmun tin deuhthaw ah ruah a tla tlem hle a, northeast India, Himalayan State leh Tamil Nadu ah te erawh tlemin a zia awm tiin India Meteorological Department (IMD) chuan a sawi.
El Nino hi central pacific lum avanga chumi nghawng kal zelin India ramah pawh monsoon ruahsur a tihtlem zui a ni.
Kumin August anga India-in ruahtui a dawn tlem hnai ber chu kum 2005 kha niin khatah khan 25% vel laiin a dawng tlem a, khami kum kha India in kum zabi chanve hnua khawkheng a tawn nasat ber kum a ni.
Ram pum huapin August thla khan ruahtui deficit 10% niin regional deficit chu east leh northeast ah 17% niin central India-ah 10% leh southern India-ah 17% a ni thung.
“Break days a a nasa zual zel” tiin M. Mohapatra, Director General, IMD chuan a sawi a. “break days tih chu June-September monsoon thla chhunga ruahsur lova a awm rei zawng sawina a ni,” tiin a sawi bawk.
July 31 khan IMD te chuan August ruahtui tla chu ‘below normal’ a ni ang an ti lawk a, mahse an beisei ai daihin ruahtui tla chu a tlem zual ta a ni.
September thla chu furpui thla tawp ber anga ngaih niin ruahtui tla tha tura ngaih a ni thung a.
“Normal rainfall kan hmuh hmel a, a chhan ber pawh Indian Ocean dinhmun tha vang niin ruahtui keng low pressure pahnihin Bay of Bengal a tuam mek a ni,” tiin IMD Meteorologist te chuan an sawi.