Australian Open record prize money-in player-te lungawina la thlen zo chuang lo!

Australian Open record prize money-in player-te lungawina la thlen zo chuang lo!
January ni 18 atanga khelh tan tur 2026 Australian Open-a an lawmman semral tur hi he tournament chanchina prize money tam ber tum tur ni mah se player-te an lungawi chuang lo a, he Grand Slam kaltlanga sum lut (total revenue) atanga chhutin lawmman atana an sum tiam thar hi a la lian tawk lo niin an sawi!
Kum khat chhunga Grand Slam tournament khelh hmasakber thin Australian Open hian kuminah record siamin prize money atan pound maktaduai 55 semchhuah an tiam a; he total prize money hi tournament khelhna ram pawisa Australian dollar chuan maktaduai 111.5 zet tlingin, nikum aiin 16% laiin a pung a, he tournament history-a player fund sang ber tur a ni.
Kumina mipa leh hmeichhe singles champion ve ve hian US dollar maktaduai 4.15 (£2.05m) ve ve dawngin, 2025 winner pahnih Madison Keys leh Jannik Sinner-te’n nikuma an humhaw aia a punna pawh 19% zet a tling.
He season-opening Grand Slam-a tel singles leh doubles player zawng zawngte sum dawn tur punna percent hniam ber pawh hi 10% a ni.
Tennis Australia chief executive Craig Tiley chuan lawmman an tihpunin a entir chu eng level-ah pawh tennis career zawng zawng an thlawpzia lantirna niin a sawi.
A nihna takah chuan player lawk zualhoin nikum October thla khan he Grand Slam tournament prize money chu tipung turin an nawr piahlamah kawng hrang hranga player-te hamthatna lam thuk zawka kalpui turin an phut a.
Tunah Australian Open-in lawmman pun chho bawk mah se he tournament leh Grand Slam dangte pawhin player-te beisei ang chhanna hi an pe lo vek niin BBC Sport thu lakna chuan a tarlang.
Men’s and women’s top 20 player-te chuan inthurualin major tournament palite hnenah ziakin tournament atanga an sum hmuhchhuah atanga chanpual sang zawk (higher ratio of prize money-to-revenue) pek an phutna an thlen a, star player rual zingah hian Janik Sinner, Aryna Sabalenka leh Alexander Zverev-te pawh an tel nghe nghe.
He’ng mite hian an sport buaipui ruhrel leh hawiher chungchanga inrawnkhawm hun tam zawk buatsaih bakah Grand Slam palite kaltlanga pension, healthcare leh hmeichhe player naupai leh hringte puala sum tam zawk dah an phut bawk.
He tih lai hian nikum chhunga Tennis Australia sum chet vel dan (2025 accounts) chu vantlang hriata tarchhuah a la ni lo tih Australian Financial Review report-in a tarlang.
Tennis Australia sum hmuhna pui ber hi Australian Open niin, chu mi awmzia chu kum 2025-a an sum lakluh belhkhawm (total revenue) US dollar maktaduai 697.2 (£346m) kha Melbourne khaw tournament atanga an hmuh a ni deuh ber tihna a ni.
Nikum tournament atanga organising body Tennis Australia sum lakluh zaa 16 kha kumin hian Australian Open prize money atan an thehchhuak dawn a, chu chu player-te hian tlem an ti a, anmahni avanga en hlawh leh an sum hmuh pawh pung a nih laia player-te ber hlawh atana an sum huiluh leh pekchhuah inbuktawk lo chu player-te hian an lungawipui thei ta lo a ni – prize money zat tipung tho bawk mah se.
Kum 2025 khan US Open lam pawhin a hma kuma an sum lakluh atanga 16% tho player-te hlawh atan an thehchhuak ve bawk a; Wimbledon (13%) leh a zat tarlan ve loh French Open pawhin prize money atan an sum hmuh atangin zaa 16 an sem chhuak tling bik lo.
Ranking nei sang zual player inthurualte hian nikum kum tawp lam khan Grand Slam tinte hi kum nga lo kal tur chhung hian prize money san zel turin an ngiat a; an phut ang hian tihlawhtling dawn se a kum nganaah phei chuan Grand Slam palite hian an sum hmuh atanga 22% lai an thehchhuah tlin a ngai dawn a, chu chu player-te’n ATP leh WTA tour atanga an sum hmuh tur belhkhawm ai pawhin a tam dawn!
Kumin atana total prize money pun a nih tur thu la puang awmchhun ni rih Australian Open hi nikuma Wimbledon (£53.5m) leh French Open (£47.5m)-te lawmman aiin a tam dawn a; chutih laiin prize money lama pawk ber US Open (£67.4m) erawh an la pha lo viau thung.
Australian Open hi Melbourne khawpuiah January ni 18 atangin thlir tur a awm leh tan tawh dawn a nih kha.