Bagde dum leh PGI 2.0 report

Mizoram Government School Teacher’s Union (MIGOTSU) chuan an thil phut tihhlawhtlinsak tura sawrkar nawr nan badge dum an bel a, April 25 thleng awh tur a ni.
MIGOTSU hian thil phut pathum an nei a, chungte chu – Provincialisation revoke-na order sut leh; Provincialise-a upgradation enrollment criteria atana urban leh rural inang renga siam lo turin; Middle school leh high school-a headmaster, kum 20/30 zet rules mumal tak hnuaia enkawl tawh, teacher-a an tlakhniam (stepdown) na tur dan cancel turin.
School Education minister chuan sawrkar hmalaknaa MIGOTSU an lungawi zo lo mak a tih thu sawiin, an tana hma kan lakna hi ngaichang thiam se, a ti ve thung.
National Achievement Survey (NAS) hnuaia India ram pumpuia zirna tehkhawng Performance Grading Index 2.0-ah Mizoram chu State leh UT 36 zingah a hniam ber dawttu tiin education minister hian a sawi a; midangte umphak tumin thapui thawhin kan tlan mek, a ti bawk.
A chunga tarlan atang khian, eng nge lo lang ta? Zirtirtuten dinhmun tha zawk an nawr a, chutih laiin an enkawl ber zirlaite dinhmun pawh dawmkan a lo ngai nasa hle mai tih a lo lang ve nghal a. Zirtirtute hian an dikna leh chanvo chan tumin an nawr a ni thei e; nawr ang hmiang, sawrkar nen inbia se, a tha e. Mahse, zirna tehkhawng hrang hrang hmanga tehnaah India rama a hniam ber dawttu kan nihna hi zirtirtute hian vei tel thei se a duhawm hle mai. State leh UT 36 zingah hian a hniam ber pathumte hi Arunachal, Mizoram leh Meghalaya te an ni.
PGI 2.0 hnuaiah hian Grade 10 siam niin, 90% chunglam chu Grade sang ber a ni a. Chuta tang chuan a chhuk thla zel a, Grade hniam ber chu ‘less than 10%’ (Akanshi-3) tih a ni a, chutah chuan Meghalaya a hniam ber a, Mizoram chu a dawttu a ni.
Zirna atana nu leh pate leh sawrkar insenso nasat dan nena han buk/khaikhin hi chuan, hlawh tha tak neia rawih, hamthatna tam tak dawng mek sawrkar hnuaia thawk zirtirtuten India rama a hniam ber dawttu-a min hung si hi, nu leh pate hian lungawiloh lantir nan badge dum lo bel ve ta pawh ni se, ‘an thiamawm khawp ang’ kan ti ve mai dawn em ni ang le?