Balhla leh lakhuih chingtute pui

Balhla leh lakhuih chingtute pui
MIzoram Forest department chuan Saitual leh a chhehvela balhla leh lakhuihthei huan neitute tanpuina tur a hlan.
Sawrkar laipuiin ngaw leh leilung hrisel siamna atana wetland-a a puan bulhnaia awmte tana a ruahman, loneituten ngelnghet zawka a hmun ngaia ei an zawnna theihna tur Tamdil Wetland IMP (Integrated Management Plan) tanpuina sumfai chu EF&CC minister Lalthansanga’n March 21 khan Tualbung, Sihfa, Dilkhan leh Saitual Village Counci III huamchhunga balhla leh lakhuihthei chingtu chhungkaw 106 hnenah a hlan.
Kuthnathawktuten eizawnna ngelnghet an neih theihnan sawrkar laipuiin project tha tak a rawn siam bawhzuiin state sawrkarin hma a la a, Mizote kan lo neih dan ber shifting cultivation hi zawimuanga a thlakna ngaihtuah a ni tih a sawi.
“ZPM-in sawrkarna a chan veleh khan inrenchemna kan kalpui nghal a, chuti chung chuan campaign laia kan auhla ber leh tih an intiam ang kan ti zel a. Kuthnathawktuten an thawhrim rah an phu ang ngeia an seng theihnan hma kan la a, thlai thar hralh chungchangah pawh chak takin hma kan la zel a, mipui pawhin dawhtheihna nen sawrkar hmalakna kan ngaihchan thiam a pawimawh hle,” Lalthansanga hian a ti.
Mahni ram thar chhuah ngaihsan nachang kan hre thar zel a, ei tur hrisel hnianghnar taka kan neih theihnan kuthnathawktute tha tih chak a pawimawh, tiin, ei leh in chauh ni lo rubber leh thildang market tha si pawh uar chhoh zel a ngai tih a sawi. “Kan thil thar chhuah a tam zel theihnan link road tha neih a pawimawh a, chumi tur chuan sawrkarin ngaihtuahna thar nen chak takin hma a la mek a ni,” a ti.