Bali-a tlang kang vangin thlawhna thlawk tur thulh nasa
Bali-a tlang kang vangin thlawhna thlawk tur thulh nasa
Indonesia-a chawlh hmanna thliarkar, Bali-a tlang kang inphuh chhuak avangin thlawhna lut leh chhuak tur thahnem tak thulhtir an ni a. Inphuh chhuak hi van sang km 10 zeta sangte a tling.
Khualzinten an tlawh nasat tak, Flores-a metre 1,584-a sang, Mount Lewotobi Laki-Laki kang hi Thawhlehni khan a inphuh chhuak leh tan a, inralrinna sang ber, four-tiered system tihchhuah a ni.
“East Nusa Tenggara-a Lewatobi Laki-Laki tlang kang avang hian I Gusti Ngurah Rai Airport atanga thlawhna lut leh chhuak tur tam tak thulhtir a ni,” tiin airport operator Angkasa Pura Indonesia chuan AFP hnenah a sawi.
Thlawhna thlawk tur thulh zingah hian Jetstar, Virgin Australia, Air India, Air New Zealand, Singapore-a Tigerair leh China-a Juneyao Airlines te pawh a tel.
Jetstar chuan Bali atanga an thlawhna lut leh chhuak an thulhtir thu hi an website-ah tar langin thlawhna dang thenkhat, Nilaini chawhnua thlawk tur pawh meivap tam lutuk avanhgin tihkhawtlai a ni tih an tar lang.
“Meikhu leh vap hi zan lamah chuan a fai theih beisei a ni a. Chawhnua thlawk turte chu zanah sawn a ni ang,” an ti.
Tual chhunga thlawk, AirAsia pawhin Flores-a khualzin tlawh nasat, Labuan Bajo atanga an thlawhna chhuak tur an thulhtir bawk.
Lewotobi Laki-Laki atanga tlang kang inphuh chhuakin a ken tuite chu a bul hnai khaw eng emaw zatah tlain Thawhlehni zan khan khaw pakhat chu inthiar chhuak tura tih an ni tih an ram disaster mitigation agency chuan a sawi.
Tlang kang avanga nghing pawh a la awm reng bawk a. Geology agency chuan mi cheng leh khualzinte chu tlang a kanna hnaih km sarih bialah kal lo turin an ti.
Engmah chhia leh thi leh hliam an awm hriat a la ni lo.
November khan vawi eng emaw zat a lo inphuh chhuak tawh a, mi pakua thiin Bali-a thlawhna lut leh chhuak tam tak thulhtir niin mi sang tam tak insaseng tura tih an ni bawk.
Laki-Laki hi Indonesian tawng niin ‘man’ tihna a ni a. A bul chiahah tlang dang, kang ve vak ngai lo awmin hei hi ‘woman’ an ti ve thung.
Indonesia hi thliarkar tam tak awm khawmna niin a awmna hmun hi lirnghing leh tlang kang awm duhna hmun niin Pacific ‘Ring of Fire’ an tih laia awm a ni.