Bana kaih ngai – chawhmeh zuarte

Tuikual Veng huam chhunga Horticulture directorate chhehvel kawngkamah Aizawl Municipal Corporation-in inzawrh phal loh thu a siam tawh hnuah Inrinni kalta, April 19 khan chawhmeh zuar engemawzat chu kawngkamah an inzuar leh a.
Hei hi a chhan chu, chawhmeh zuarte insawnna tura ruahman AMC Multi Complex-a ground floor chu lirthei dahna hmun atan hman a ni a, lirthei dahtute hian, dah man an chawi ve tho avangin, lirthei an dahsawn duh si lo a, thutna an chang lo niin kawngkama inzuar lehte chuan an sawi a. Chawhmeh zuar thenkhat erawh, Multi Complex lama seat allotment nei lo hrim hrim te pawh an awm nia sawi a ni bawk.
Hetih lai hian, AMC lam chuan Inrinni awm leh turah chuan khauh taka inpho phal lohna hi kenkawh leh an tum tih an sawi bawk a.
A manganthlak viau mai. Bana kaih ngai hi kan tam a, chutih rualin kan inkai seng rih lo chu a ni ber awm e. Hlawhtlinpui turte bana kan kaih laiin, hlawhtling thei lo, nung ve tawk tawk, bana kaih ngai ngawih ngawih zawkte dinhmun hian ngaihthah a hlawh leh hlauh zawk em aw, a tih theih ta rum rum mai.
Inrinni lo awm leh turah chuan khauh zawka dan kenkawh tum a nih thu auchhuahpui a nih lai hian, thutna chang lo, intun nun nana chawhmeh zawrh bak tih theih nei si lo heng chawhmeh zuar dinhmun harsa ve tak takte hi an thutna tur ruahman tum chuang si lova kan hnawt kual vel mai mai te a lo nih hlauh chuan, thil dik lo leh tha lo tak a ni ang.
Thuneitute pawh hian, thuneihna lekkawh piah lamah, a tuartu (victim) te dinhmun tur hi an ngaihtuah tel a pawimawh hle mai a, khapna dan pawh pawisa zo lo khawpa an awm tawh chuan an mangang tawh hle tihna te pawh a lo ni thei a. Bana kaih ngai hlei hlei hi kan kai tha duh leh lo te hi a lo ni palh hlauh ang e.
Hnawh kian ringawt tum lovin, an inzawrh ve theihna tur lam hi ruahman sak tel thei ila a va duhawm em!