Bandh hi vote zawnna mai Congress-in FCAA a duh lo – MPCC

Bandh hi vote zawnna mai
Congress-in FCAA a duh lo
– MPCC
FCAA 2023 chungchangah MNF leh ZPM chu inbei tur an awm loa, duh lohna total bandh siam pawh MNF party-in Dampa bial inthlan atana vote a zawnna ni ah an ngai tih Congress party chuan an sawi.
MPCC thuchhuak chuan, 2023 July 26-a Parliament-a FCA Bill sawiho a nih khan Congress MP-ten nasa taka an dodalna karah pass a ni a. Bill pass ni khan MNF MP (Lok Sabha) pawh Parliament-ah BJP lamah a thu tih a sawi. MNF-in FCAA an dodal tak tak a nih chuan he dan siamtu BJP an thawhpuina NDA chhuahsan a, BJP nen an thawhdunna chhuchat ngam turin an phut tih a sawi a ni.
He dan pawmpuina resolution chu Assembly House-ah ZPM sawrkarin a pass ve leh chu Mizoram tana pawi tak a nih avangin tha an ti lo takzet tih a sawi bawk.
Kumin October 15-a MPCC president Pu Lal Thanzara’n AICC hotute Delhi-a a hmuhnaah FCAA chungchang a sawipui a. Mizoram map enhoin, international boundary atanga km.100 huam Myanmar leh Bangladesh karcheh chhung kan nih deuh vek dan a sawi a. AICC general secretary KC Venugopal chuan Congress-in thuneihna a chan veleh FCAA hi an ennawn nghal dawn tih a lo hrilh tih sawi a ni.
‘2019 MP inthlan dawnah Citizenship Amendment Bill do turin MNF an intiam a. Thlan tlin an nih hnuah Lok Sabha-ah he bill thlawptu an ni leh si. CAB an thlawp chhan NE states a huam ve lo nia an sawi ang khan, FCAA-in NE states huamtir ve lo tura NDA sawrkar an nawr thlu thei a nih loh chuan, FCAA dan pass tute zingah MNF MP an tel avangin, he dan hi do ve thei an ni loa, by-election vote zawnna avanga total bandh neiah kan ngai,’ MPCC hian a ti.
Chief minister chu YMA inkhawmpui liana FCAA huam chin tur international boundary atanga km.10 nia a sawi chu thudik lo a nih avangin, thupha a chawi lo a nih chuan thudik lo hmanga FCAA hlauhawm lo anga mipui zirtir tum niah MPCC chuan a ngai tih a sawi a ni.